Genesis1 vs Johannes 1

In die begin het God die hemel en die aarde geskep.

In die begin was die Woord,

Die aarde was woes en leeg, en donkerte was oor die oerwater.

en die Woord was by God,

Maar die Gees van God het oor die water gesweef,

en die Woord was God. Hy was in die begin by God. Alles het deur Hom ontstaan, en sonder Hom het selfs nie een ding wat bestaan, ontstaan nie.

en God het gesê: “Laat daar lig wees!” En daar was lig.

In Hom was lewe, en dié lewe was die lig vir die mense.

God het gesien dat die lig goed was.

God het toe die lig en die donker

van mekaar geskei.

En die lig skyn in die duisternis,

en die duisternis kon dit nie uitdoof nie.

God het die lig dag genoem en die donker het Hy nag genoem. En dit was aand en dit was oggend

DAG EEN.

Ek sukkel om my gedagtes te orden.
Om dit wat ek dink en ervaar bymekaar te maak en in woorde vas te vang.
Ek sukkel om sin te maak van al die informasie en gedagtes en podcasts en blogs wat deur my lewe stroom en almal erens n opdrifseltjie los.

Die Liewe Vader is besig om met my en in my te werk en ek is totaal oorbluf met al die gedagtes en idees wat deur my kop speel. Ek is nuuskierig om te sien waarheen Hy op pad is met my .

Maar ek is ook bang.
Ek is bang ek mors dit op , of ek mis die punt.

En so is dit al 12 jaar later. 12 Jaar waarin baie goed gebeur het. Maar kom ons los dit maar eers daar. Miskien kan ons eendag deur n lysie gaan van al die goed wat gebeur het.

My laaitie verjaar vandag. Hy is vandag 24 ! Dit laat my skoon oud voel. En ek het vandag vir my n bril gekoop. Een van daai +1 jobbies wat jy sommer so van die rak afhaal. Want my arms raak te kort as ek probeer om my selfoon se skerm te lees. En as ek my arm lank genoeg kry , dan kan ek nie die klein skriffie op die skerm lees nie. En dit laat my ook oud voel.

Maar in my kop voel ek nie so oud nie. In my kop voel ek of ek nog alles kan doen. En vir alles kans sien. Wat soms beteken dat my lyf die volgende dag met ernstige klagtes kom as dit by opstaan kom.

Ek gaan probeer om meer gereeld hier te kom skryf. Ek sal probeer om weer soos aan die begin grappies en stories te kom skryf wat my hopelik weer sal dwing om die snaaks en die mooi in die lewe raak te sien.

Ek sal probeer om nie so baie te kom kla nie. Ek wonder wie hier sal lees. Ek wonder of ek nuwe blog vriende sal ontmoet. En dalk weer van die oues sal raakloop.

Tyd sal leer.

Groete vir eers.

Adoonsie

Lees enigiemand nog ooit hier. Ek bedoel nou behalwe die bleddie bots. En hoeveel van my Blog vriende skryf nog op hulle blogs ? Kerneelsie , Sonja , Plaasie ?

Ek wonder of ek weer die moeite moet doen om hier te begin skryf . 12 jaar later. Of dalk maar ‘n adoonsie die 2de blog te begin.

So op n manier. Jammer ek was so lanklaas hier.

Hier is n link na my nuutste Ride Report oor die naweek se rondry.

A Little breakaway to Onrus

Party dae is die verlange na ‘n maatjie net soveel erger as ander dae….

Vandag is een van daai dae.

Not a good day.

So kan dit nie aangaan nie.

As julle die hele trippie se report wil sien kan julle gerus hier gaan loer :

http://dsadventure.wordpress.com/

Is ek nie in ‘n goeie plek nie. Ek voel ontkoppel van die lewe. Moeg. Gatvol. Afgestomp.

Ek is moeg vir die plek waar ek werk en sy politiek.
Ek is moeg vir alleen wees.

Ek wens ek kon in my eie plekkie bly waar ek kon doen soos ek wil.
Ek wens ek kon my lewe met iemand spesiaal deel
Ek wens ek kon nou op my motorfiets erens in die karoo op n grondpad wees.

Vanoggend vat ek die pad met die bike en gaan ry om so bietjie my kop skoon te maak. Toe my vriendPlasie my nooi om saam met hom te gaan rondvlenter vir die Sondag draai ek bike se kop Oos en sit die stuk in na Somerset Wes toe waar ek vir Plasie ontmoet.

Die plan is om dan sommer die fiets daar by hom te los en die pad te vat met sy bakkie. So daag ek dus met vol bike kit by Plasie op. Die baadjie los ons in sy voorkamer , maar die boots en die broek moet ek maar dra. Daar is nie ander goed om aan te trek nie
Gestewel en gespoor spring ons in die bakkie en sit ons die stuk in , rigting Kleinmond. Tussen al die rondry en gesels kom ek later agter dat ek nou heeltemaal te warm aangetrek is vir die rit in die bakkie. By die Peregrine padstal hol ek gou in die badkamer in om van my ry broek se winterliner ontslae te raak.

Maar om die liner uit te haal is nogal n hele operasie. Ek stap toe maar in een van die toilet hokkies in en maak die deur toe. Nou moet ek eers die broekspype los maak. Dan my bootse uit trek. Dan kan ek die broek uit trek. Ek kry toe sommer gou my sit op die loo terwyl ek die liner los maak en uit die broek uit trek.

Met al die gewerskaf het ek nie opgelet na die waaiertjie wat in die plafon bo my kop was nie. Toe die waaiertjie dus skielik outomaties aan skakel kyk ek op om te sien wat nou so lawaai. Met die opkyk val my sonbril wat bo op my kop gesit het agter teen my nek en my rug af. Ek besef toe dat ek sal moet plan maak om te keer dat my sonbril nie agter my rug af in die toilet val nie.

Die vinnigste en maklikste manier om dit te voorkom blyk toe om maar net agter toe te sit met my rug teen die muur en so die sonbril se val te keer. En met die terug sit slag druk my rug teen die baie fancy toilet se spoel knoppie.

Ek moes baie baie hard op my tanne kners om nie kliphard te gil toe daai yskoue water skielik my klokke hier van onder af begin afspoel nie. Ek kan julle verseker daai water was ysig koud gewees. Soos Plasie sê , meeste ouens druk hulle tone in die water as hulle wil voel hoe koud die water is.