នេះគឺជាការផ្សាយសាកល្បង។សូមអរគុណ!
Watch “[RHM VCD គូស្នេហ៌៦ឆ្នាំ] (05) Ber Srolanh Bong Oun Trov Srolanh Klun Ang” on YouTube
ខែមីនា 28, 2012
បញ្ចេញមតិ
ចំណាត់ក្រុម ៖ព្រឹត្តិការណ៏ជាតិ
ទទួលទាន ក្រូចច្របាច់ រាល់ថ្ងៃ ប្រឈមនឹង រោគរលាកសន្លាក់ ទំព័រខាងមុខ
ខែកុម្ភៈ 1, 2011
មតិ ១
ទោះបីជា នៅក្នុង ទឹកក្រូចច្របាច់ សម្បូរទៅដោយ វីតាមីនក្តី តែក៏សម្បូរ ទៅដោយ ជាតិស្ករ ហ្វ្រុកតូសដែរ ។ ក្រោយពេល ស្ករប្រភេទនេះ ចូលទៅសន្សំទុក នៅក្នុងរាង វានឹងបំប្លែង ទៅជា អាស៊ីដយូរិក ទៅបំផ្លាញឈាម ដែលរត់ទៅ ចិញ្ចឹមសន្លាក់ ឆ្អឹង បណ្តាលឱ្យ ហើម និង រលាក ។ តាមលទ្ធិផល ពិសោធ រកឃើញថា អ្នកផឹក ទឹកក្រូចច្របាច់ មួយថ្ងៃមួយកែវ មានអត្រាប្រឈម នឹងរោគរលាកសន្លាក់ ដល់ទៅ ៤១ ភាគរយ ។
ចំណែកភេសជ្ជៈ ដែលងាយ ប្រឈម នឹងរោគខាងលើនេះ ឆាប់បំផុតគឺ ទឹកក្រូចកំប៉ុង ឬ ដប ព្រោះក្នុងនោះ មានជាតិស្ករខ្ពស់ ជាពិសេសមាន អាស៊ីដកាត់ក្រពះ ទៀតផង ។ អ្នកផឹកទឹកក្រូច កំប៉ុង រាល់ថ្ងៃមានអត្រា ប្រឈមនឹង រោគរលាកសន្លាក់ រហូតដល់ ៧០ ភាគរយ ឯណោះ ៕
ចំណាត់ក្រុម ៖ជីវិតនិងសង្គម
គណបក្សកុម្មុយនិស្តវៀតណាមកំពុងស្វែងរកអ្នកដឹកនាំថ្មី
ខែមករា 18, 2011
បញ្ចេញមតិ
សមមិត្តនៃគណបក្សកុម្មុយនិស្តវៀតណាមប្រមាណ១ ៤០០នាក់មកពីគ្រប់ទិសទីនៃប្រទេសវៀតណាមបានមកចូលប្រជុំមហាសន្និបាតលើកទី១១ ដើម្បីបោះឆ្នោតជ្រើសតាំងសមាជិក២០០នាក់នៃគណៈកម្មាធិការមជ្ឈិមថ្មី។ គណបក្សកុម្មុយនិស្តវៀតណាមគឺជាគណបក្សនយោបាយតែមួយគត់ដែលមាននៅប្រទេសវៀតណាម។ រដ្ឋអំណាចវៀតណាមបដិសេធពុំព្រមឲ្យមានគណបក្សនយោបាយដទៃទៀតក្រៅពីគណបក្សកុម្មុយនិស្តវៀតណាមឡើយ។
ចំណាត់ក្រុម ៖ព្រឹត្តិការណ៏អន្តរជាតិ
បញ្ចប់តំណែងប្រធានមន្ទីរសាធារណៈការនិងដឹកជញ្ជូនក្រុងភ្នំពេញក្រោយពីរកឃើញភាពមិនប្រក្រតីជាច្រើន
ខែមករា 18, 2011
បញ្ចេញមតិ
នៅព្រឹកថ្ងៃចន្ទនេះ សាលាក្រុងភ្នំពេញបានបញ្ចប់ប្រកាស់បញ្ចប់តំណែងលោក ញ៉ែម សារ៉ន ជាប្រធានមន្ទីរសាធារណៈការនិង ដឹកជញ្ជូនក្រុងភ្នំពេញ ដោយជំនួសតំណែងដោយលោក អ៊ាន ណារិន វិញ។ ការបញ្ចប់តំណែងលោក ញ៉ែម សារ៉ន នេះ គឺដោយសារមានការរកឃើញភាពមិនប្រក្រតីផ្នែករដ្ឋបាលមួយចំនួននៅក្នុងមន្ទីរនេះពាក់ព័ន្ធនឹងការធ្វើស្លាកលេខយានយន្តកន្លងមក។
លោក ញ៉ែម សារ៉ន អតីតប្រធានមន្ទីសាធារណៈការក្រុងភ្នំពេញ
លោក កែប ជុតិមា អភិបាលក្រុងភ្នំពេញបានថ្លែងក្នុងពិធីមួយឯមន្ទីរសាធារណៈការ និងដឹកជញ្ជូនថា ការបញ្ចប់តំណែងលោក ញ៉ែម សារ៉ន គឺដោយសារតែរកឃើញថា មានភាពមិនប្រក្រតីក្នុងការធ្វើស្លាកលេខយានយន្តគ្រប់ប្រភេទជូនប្រជាពលរដ្ឋ។
ជាមួយគ្នានេះ លោក វ៉ន ពៅ ប្រធានសមាគមប្រជាធិបតេយ្យឯករាជ្យ នៃសេដ្ឋកិច្ចក្រៅប្រព័ន្ធបានអបអរសាទរ ចំពោះការផ្លាស់ប្តូរតួនាទីមន្រ្តីរូបនេះ ប៉ុន្តែលោកនៅមិនហ៊ានអះអាងថា តើអ្នកដែលឡើងមកកាន់តួនាទីថ្មីនេះ នឹងប្រព្រឹត្តិអំពើពុករលួយនៅក្នុងតំណែងថ្មីនេះ ឬយ៉ាងណានៅឡើយទេ។
គួរបញ្ជាក់ថា ការប្រកាសដកតំណែងលោក ញ៉ែម សារ៉ន ពីប្រធានមន្ទីរសាធារណៈការក្រុងភ្នំពេញនៅព្រឹកមិញនេះ គឺស្របគ្នានឹងការប្រកាសឲ្យលោក ញ៉ែម សារ៉ន ចូលនិវត្តផងដែរ៕
ចំណាត់ក្រុម ៖ព្រឹត្តិការណ៏ជាតិ
ធ្វើខួបកំណើតឱ្យដំរីនៅវត្ដភ្នំ៥០-៥១ឆ្នាំ មានភ្ញៀវជាតិ អន្ដរជាតិចូលរួមជាង១០០នាក់
ខែមករា 18, 2011
បញ្ចេញមតិ
ភ្នំពេញ ៖ នៅល្ងាចថ្ងៃទី១៧ ខែមករា ម្សិលមិញនេះ មានមនុស្សប្រមាណជាង ១០០នាក់ បានចូលរួមធ្វើពិធីខួបកំណើតឱ្យដំរីនៅវត្ដភ្នំ ខណ្ឌដូនពេញ ដែលគេ សង្កេតឃើញមានភ្ញៀវជាតិ និងភ្ញៀវអន្ដរជាតិចូលរួមយ៉ាងច្រើនកុះករ ។
លោកស៊ិន ស៊ន អាយុ៥៥ឆ្នាំ ជាហ្ម ដំរីបានឱ្យដឹងថា នេះជាលើកទី២ហើយ ដែលគាត់បានធ្វើខួបឱ្យដំរីញីរបស់គាត់ ប៉ុន្ដែពិធីខួបកំណើតនេះមិនមានការផឹកស៊ី និងកាត់នំខេបទេ គឺគ្រាន់តែមានផ្លែ ឈើបន្ដិចបន្ដួចប៉ុណ្ណោះសម្រាប់ឱ្យដំរី របស់គាត់ និងភ្ញៀវចូលរួមពិសា ។ លោកបានឱ្យដឹងថា ដំរីរបស់គាត់មាន ឈ្មោះមីសំបូរ ឆ្នាំនេះមានអាយុ៥១ឆ្នាំ គត់ ។ លោកស៊ិន ស៊ន បច្ចុប្បន្នស្នាក់នៅ ផ្ទះលេខ២៣៨ ផ្លូវព្រះសីហនុ សង្កាត់បឹង កេងកង២ ខណ្ឌចំការមន ហើយលោក មានស្រុកកំណើតនៅភូមិត្រញំងព្រូស ឃុំ សំរោង ស្រុកសំរោងទង ខេត្ដកំពង់ស្ពឺ ។ លោកបានបញ្ជាក់ថា ដំរីដែលគេបាន ចាប់នៅខេត្ដកំពង់ស្ពឺ ក៏មានឈ្មោះអា សំបូរដែរ ហើយគាត់នឹងម្ចាស់ដំរីធ្លាប់ បានរាប់អានគ្នាជាយូរមកហើយ ប៉ុន្ដែ ឈ្មោះសំបូរដូចគ្នាដែលដំរីរបស់គាត់ ជាដំរីញី ។ ដោយឡែកអាសំបូរនៅកំពង់ ស្ពឺ ជាអាសំបូរឈ្មោល ហើយត្រូវបានគេ ចាប់ទៅរក្សាទុកនៅឯភ្នំតាម៉ៅ ។ លោក បានបន្ដថា ដំរីរបស់គាត់នេះគាត់បាន ចិញ្ចឹមតាំងពីអាយុ៨ឆ្នាំមកម្ល៉េះ ហើយវា មិនទាន់មានកូននោះទេ ។ 
ទាក់ទិនទៅនឹងថា តើដំរីរបស់គាត់ នៅលីវ ឬក៏មានឈ្មោលទៅហើយនោះ គាត់បានឆ្លើយថា វានៅលីវ ប៉ុន្ដែសម្រាប់ គាត់វាមិនសូវកាចប៉ុន្មានទេ តែអ្នក ផ្សេងវាអាចកាចដែរ ។ លោកបានបញ្ជាក់ ថា មូលហេតុដែលគាត់ដាក់ឈ្មោះដំរី របស់គាត់ឈ្មោះមីសំបូរ ដោយសារតែ ចាស់ៗពីដើមគេនិយមដាក់ឈ្មោះដំរី អាសំបូរ មីសំបូរ ឬឈ្មោះសម្បត្ដិ ឬ អាចំរើន ជាដើម ។
លោកបានឱ្យដឹងដែរថា ដំរីរបស់គាត់ បានមកដឹកភ្ញៀវនៅរមណីយដ្ឋានវត្ដភ្នំ នេះតាំងពីឆ្នាំ១៩៨២មកម្ល៉េះ ហើយនៅ ថ្ងៃធម្មតា ចាប់ពីថ្ងៃចន្ទ ដល់ថ្ងៃសុក្រ ក្នុងមួយថ្ងៃលោកអាចរកប្រាក់ចំណូល បានតែ១០ដុល្លារ ឬក៏៥ម៉ឺនរៀលតែ ប៉ុណ្ណោះ តែសម្រាប់ថ្ងៃសៅរ៍ លោកអាច រកប្រាក់បាន១០ទៅ១៥ម៉ឺនរៀល ខុសពី ថ្ងៃធម្មតា ព្រោះមានភ្ញៀវទេសចរច្រើន ។
លោកស៊ិន ស៊ន ម្ចាស់ដំរីឈ្មោះសំបូរបាន បញ្ជាក់ថា ប្រាក់ដែលរកបានពីការដឹក ភ្ញៀវនៅជុំវិញរមណីយដ្ឋានវត្ដភ្នំ ប្រាក់ នេះលោកចំណាយទិញចេក និងអំពៅឱ្យវា ស៊ី ហើយសល់ប៉ុន្មាន គឺលោកសម្រាប់ ចិញ្ចឹមគ្រួសារ ។ លោកបានបន្ដឱ្យដឹងថា មូលហេតុដែលលោកបានរៀបចំកម្មវិធី ធ្វើខួបកំណើតឱ្យមីសំបូរ ក៏ព្រោះតែ កាលពីដើមឡើយ ជំនាន់ចាស់ៗពីមុន ពិសេសឪពុកម្ដាយរបស់គាត់ធ្លាប់ធ្វើ បែបនេះជារៀងរាល់ឆ្នាំឱ្យដំរីរបស់ពួក គាត់ ។ លោកបានឱ្យដឹងដែរថា នៅពេល យប់ ដំរីរបស់គាត់បរត្រូវយកទៅចងទុក នៅក្រោយណាហ្គាវើល ក្បែររដ្ឋសភា ហើយពេលព្រឹកទើបគាត់យកមកវត្ដភ្នំ ដើម្បីដឹកភ្ញៀវយកលុយ ។ លោកបានបន្ដឱ្យដឹង ដែរថា នៅក្នុងមុខរបរលោក ជាមួយនឹង អាសំបូរ ពុំដែលមានបញ្ហាកើតឡើង នោះទេនៅរមណីយដ្ឋាន គឺមុខរបររបស់ គាត់បានដំណើរការទៅដោយសុខសប្បាយ បើទោះបីជារកប្រាក់មិនសូវបានច្រើន តែសម្រាប់ថ្ងៃបុណ្យទាន លោកអាចរក ចំណូលបានច្រើនជាងថ្ងៃសៅរ៍ ។
លោកស៊ិន ស៊ន បានមានប្រសាសន៍ ថា នៅថ្ងៃខួបកំណើតមីសំបូរ គាត់នឹង ប្រារឰជារៀងរហូត ហើយលោកសប្បាយ នៅថ្ងៃនេះដោយសារមានភ្ញៀវជាតិ ពិសេសភ្ញៀវអន្ដរជាតិបានចូលរួមអបអរ សាទរខួបកំណើតមីសំបូរ គម្រប់៥០ឆ្នាំ ឈានចូល៥១ឆ្នាំនៅល្ងាចមិញនេះ ។
គួរបញ្ជាក់ថា នៅកន្លែងប្រារឰពិធី ខួបកំណើមីសំបូរ គេសង្កេតឃើញដំរី មួយក្បាលនេះ ត្រូវបានគេបំពាក់កម្រង ផ្កា និងចងប៉េងប៉ោងនៅក្បែរពោះ និង មានបំពាក់ស្លាកឈ្មោះថ្ងៃខួបកំណើត នាងសំបូរគម្រប់៥១ឆ្នាំផងដែរ ។ នៅក្នុង ពិធីនោះគេសង្កេតឃើញមានរៀបចំ ទៀនធូបផ្កាភ្ញី ដោយមាននិមន្ដព្រះសង្ឃ និងអាចារ្យចូលរួមសូត្រមន្ដប្រោះទឹក ឱ្យនាងសំបូរ បានសុខសប្បាយ និងអាយុ វែងទៀតផង ៕
ចំណាត់ក្រុម ៖ព្រឹត្តិការណ៏ជាតិ
ជនជាតិថៃ ៤នាក់ត្រូវបានសម្រេចឱ្យនៅក្រៅឃុំជាបណ្ដោះអាសន្ន
ខែមករា 18, 2011
បញ្ចេញមតិ
ភ្នំពេញ ៖ ជនជាតិថៃ ៤នាក់បន្ថែមទៀត ត្រូវបានសាលាឧទ្ធរណ៍សម្រេចឱ្យនៅក្រៅឃុំជាបណ្ដោះ អាសន្ន បន្ទាប់ពីបើកសវនការ អស់រយៈពេល ២ម៉ោង នៅព្រឹកថ្ងៃទី ១៨ ខែ មករា ឆ្នាំ ២០១១ នេះ។ ដោយឡែកលោក វីរៈ សុងខ្វាមគិត ដែលគេ ស្គាល់ថាជាមេដឹកនាំក្រុមថៃអាវលឿង សាលាឧទ្ធរណ៍បានសម្រេចឱ្យនៅជាប់ឃុំដដែល។
សូមជម្រាបថា ជនជាតិថៃចំនួន ៧នាក់ ត្រូវបានអាជ្ញាធរកម្ពុជាចាប់ខ្លួនកាលពីថ្ងៃទី ២៩ ខែ ធ្នូ ឆ្នាំ ២០១០ ដោយ ចោទប្រកាន់ពីបទ ឆ្លងដែលខុសច្បាប់ចូលក្នុងទឹកដីកម្ពុជា នៅតំបន់ព្រំដែនខេត្ដបន្ទាយមានជ័យ បន្ទាប់ពិការចាប់ខ្លួន នេះ ជនជាតិថៃទាំង ៧នាក់ត្រូវបានបញ្ជូនខ្លួនមកឃុំជាបណ្ដោះអាសន្ននៅពន្ធនាគារព្រៃសរាជធានីភ្នំពេញ ដើម្បីធ្វើការ កាត់ទោសទៅតាមផ្លូវច្បាប់ក្នុងព្រះរាជាណាចក្រកម្ពុជា។ ដោយមានសំណើរជាបន្ដបន្ទាប់ពីមេធាវីការពារក្ដីជនជាប់ ចោទ និងមន្ដ្រីស្ថានទូតថៃ ស្នើរសុំឱ្យជនជាតិថៃទាំងនោះបាននៅក្រៅឃុំជាបណ្ដោះអាសន្ន តុលាការកម្ពុជា បាន សម្រេចឱ្យជនជាតិថៃទាំងនោះ នៅក្រៅឃុំជាបន្ដបន្ទាប់ ជាក់ស្ដែងនៅថ្ងៃនេះ សាលាឧទ្ធរណ៍ បានសម្រេចឱ្យនៅក្រៅ ឃុំជាបណ្ដោះអាសន្នចំនួន ៤នាក់បន្ថែមទៀត ដែលរហូតមកដល់ពេលនេះ ជនជាតិថៃទាំង៧នាក់ ត្រូវបានតុលាការ កម្ពុជាសម្រេចឱ្យនៅក្រៅឃុំជាបណ្ដោះអាសន្នចំនួន ៦នាក់ហើយ ដោយនៅសល់តែម្នាក់ប៉ុណ្ណោះគឺលោក វីរៈ សុងខ្វាមគិត ដែលគេស្គាល់ថាជាមេដឹកនាំក្រុមថៃអាវលឿង។ បន្ទាប់ពីសាលាឧទ្ធរណ៍ សម្រេចឃុំខ្លួនជាបន្ដ នៅពេល ដែលចេញពីបន្ទប់សវនការ លោក វីរៈ សុងខ្វាមគិត បានសម្ដែងអាកប្បកិរិយា ក្រេវក្រោធហាក់មិនពេញចិត្ដនិងការ សម្រេចរបស់សាលាឧទ្ធរណ៍ក្នុងការឃុំខ្លួនលោកជាបន្ដនោះ៕
ចំណាត់ក្រុម ៖ព្រឹត្តិការណ៏ជាតិ
Samsung បង្ហាញពីរម៉ូដែលក្នុងពេលតែមួយ
ខែមករា 18, 2011
បញ្ចេញមតិ
Samsung បានបង្ហាញ Smartphone ពីរម៉ូដែលទៀតហើយគឺ Galaxy Ace S5830 និង Galaxy Suit។
Ace S5830 ត្រូវបានក្រុមហ៊ុន Samsung ដាក់រហស្សនាមឲ្យថា Galaxy Mini។ Galaxy Mini ដំណើរការដោយប្រព័ន្ធប្រតិបត្តិការ Android Froyo (2.2) កាមេរ៉ា 5មេហ្គាភិកសែលមានបន្ថែម Flash LED សម្រាប់ជំនួយ និងមានបំពាក់ដោយអេក្រង់ជាប្រភេទ HVGA។ ក្រៅពីនេះ Ace មានភ្ជាប់មកជាមួយប្រព័ន្ធបណ្ដាញ WiFi, Bluetoothជំនាន់ 3.0 GPSនិង microUSB។
Galaxy Ace និង Suit
Suit S5670 មិនទាន់មានព័ត៌មានបង្ហាញច្បាស់ពីលក្ខណៈពិសេសរបស់វានៅឡើយទេ តែគ្រាន់តែដឹងថា Suit ដំណើរដោយប្រព័ន្ធប្រតិបត្តិការ Android Froyo (2.2) ដូច Aceដែរប៉ុណ្ណោះ។
រហូតមកដល់ពេលនេះ Samsung មានគម្រោងដាក់លក់ Smartphone ដែលដំណើរការដោយប្រព័ន្ធប្រតិបត្តិការ Android ចំនួនបីម៉ូដែលហើយ ដែលកាលពីប៉ុន្មានថ្ងៃមុនទើបតែបានបង្ហាញ Galaxy S2 ប៉ុណ្ណោះ។
ចំពោះព័ត៌មានលម្អិត កាលបរិច្ឆេទចេញលក់ និងតម្លៃរបស់ Smartphone ទាំងពីរម៉ូដែលនេះក្រុមហ៊ុន Samsung មិនទាន់បានបង្ហាញយ៉ាងណានោះទេ Sabayនឹងបង្ហាញជួននៅទំព័របន្ទាប់៕
ចំណាត់ក្រុម ៖ពត៌មានបច្ចេកវិទ្យា
យុវជនម្នាក់ជាប់ចោទរំលោភនារីរោងចក្រ ត្រូវក្រុមគ្រួសារចាប់ខ្លួនឱ្យនគរបាល
ខែមករា 18, 2011
បញ្ចេញមតិ
ភ្នំពេញ ៖ យុវជនម្នាក់ត្រូវបានក្រុមគ្រួសារនារីរងគ្រោះចាប់បញ្ជូនឱ្យសមត្ថកិច្ចកាលពីថ្ងៃទី១៧ ខែមករា ឆ្នាំ២០១១ វេលាម៉ោង៥ល្ងាច ដោយចោទប្រកាន់ថា បានចាប់រំលោភប្អូនស្រីរបស់ខ្លួន អាយុ២៤ឆ្នាំ រហូតបានសម្រេច ។
តាមមន្ដ្រីនគរបាលបានឱ្យដឹងថា យុវជនជាប់សង្ស័យមានឈ្មោះ យ៉ន គឹមយុង ជាកម្មករនៅរោងចក្រកាត់ដេរ បច្ចុប្បន្នស្នាក់នៅផ្ទះជួលក្នុងសង្កាត់ទួលសង្កែ មានស្រុកកំណើតនៅភូមិក្រាំងលើ ឃុំតាឯក ស្រុកខ្សាច់កណ្ដាល ខេត្ដ កណ្ដាល ។ រីឯនារីរងគ្រោះមានឈ្មោះ ហ.ណ.ស ជួលផ្ទះស្នាក់នៅក្បែរគ្នា និងបម្រើការងារនៅក្នុងរោងចក្រជាមួយ គ្នាផង ៕
ចំណាត់ក្រុម ៖ព្រឹត្តិការណ៏ជាតិ
Firefox 4 Beta 9 ដោនឡូតបានហើយ
ខែមករា 18, 2011
បញ្ចេញមតិ
នៅទំព័រមុនយើងបានបង្ហាញព័ត៌មានម្ដងរួចមកហើយអំពីការប្រកាសកាលបរិច្ឆេទដាក់ឲ្យដោនឡូតជាផ្លូវការ Browser ថ្មីរបស់ Mozillaគឺ Firefox 4 Beta 8 version ពេញលេញនៅចុងខែកុម្ភៈខាងមុខ ។
តែមុននឹងដាក់ចេញជាផ្លូវការនេះFirefoxបានដាក់ឲ្យដោនឡូតBeta9មួយទៀត បន្ទាប់ពី Version ចាស់ដែលបានផ្សាយចេញជាផ្លូវការ។
ក្រុមហ៊ុន Mozilla បានឲ្យដឹងថា Firefox Beta9មានបន្ថែមលក្ខណៈពិសេសជាច្រើន ជាក់ស្ដែង Mozilla បានបន្ថែម bug fix ដល់ទៅ662 គឺលើសBeta 8ដល់ទៅជាងពាក់កណ្ដាលឯណោះ។ ដូច្នេះទម្រាំVersionពេញលេញចេញ Mozilla នឹងបន្ថែមចំណុចពិសេសជាច្រើនទៀតដែលអាចមានប្រៀបជាង Internet Explorer នៅលើទីផ្សារបានជាក់ជាមិនខាន។ បើចង់ដោនឡូត និងស្វែងយល់ព័ត៌មានបន្ថែមសូមចុចទីនេះ ៕
ចំណាត់ក្រុម ៖ពត៌មានបច្ចេកវិទ្យា
Sony Ericssonប្ដឹងClearwire រំលោភលើពាណិជ្ជសញ្ញារបស់ខ្លួន
ខែមករា 18, 2011
បញ្ចេញមតិ
ថ្មីៗនេះក្រុមហ៊ុន Sony Ericsson បានធ្វើពាក្យបណ្ដឹងទៅកាន់តុលាការសហព័ន្ធទទួលបន្ទុកលើបណ្ដឹងពាណិជ្ជសញ្ញានៅរដ្ឋ Virginia ប្ដឹងក្រុមហ៊ុន Clearwire ថាបានរចនាពាណិជ្ជសញ្ញាយកលំនាំតាមក្រុមហ៊ុន SE។
និមិត្តសញ្ញា របស់ ក្រុមហ៊ុន Sony Ericsson (ឆ្វេង) និង ក្រុមហ៊ុន Clearwire (ស្ដាំ)
ក្រុមហ៊ុន SE បានសំណូមពរឲ្យតុលាការសហព័ន្ធហាមឃាត់ក្រុមហ៊ុន Clearwire មិនឲ្យប្រើពាណិជ្ជសញ្ញានោះទេ ពីព្រោះវានឹងធ្វើឲ្យខាតបង់ដល់ផលចំណេញក្រុមហ៊ុនខ្លួន។
ចំណាត់ក្រុម ៖ពត៌មានបច្ចេកវិទ្យា
ស៊ឹម សុរ៉ាមភូមិ ដកភាគហ៊ុនពីហាងចាស់មកបើកហាងថ្មី
ខែមករា 18, 2011
បញ្ចេញមតិ
តារាសម្ដែង ដ៏មានប្រជាប្រិយភាពមួយរូបក្នុងប្រទេសកម្ពុជា លោក ស៊ឹម សុរ៉ាមភូមិ បានបើកហាងថតរូបថ្មីមួយនៅម្ដុំ សណ្ឋាគារ Intercontinental ដែលពីមុនគេបានបើកហាងថតរូបមួយដែរ ដែលដាក់ឈ្មោះថា “ឥន្ទធនូStudio”។ តើការបើកហាងថ្មីនេះ មានអ្វីប្លែកពីហាងចាស់? ហេតុអ្វីបានជាបែកពីហាងចាស់បែបនេះ?
សុរ៉ាមភូមិ ប្រាប់ថា ហាងដែលបើកក្រោយគឺដាក់ឈ្មោះថា Supper Studio។ តារារូបនេះបានបន្តទៀតថា ហាងមុន លោកបានចូលហ៊ុនជាមួយមិត្តភ័ក្ដិ។ សុរ៉ាមភូមិបញ្ជាក់បន្ថែមថា មូលហេតុដែលនាំឲ្យលោក សម្រេចចិត្តចាកចេញពីហាងចាស់ មកបើកហាងថ្មី មិនមានរឿងអ្វីធំដុំនោះឡើយ ដោយម្ចាស់ភាគហ៊ុនចង់បើកហាងផ្ទាល់ខ្លួន ងាយស្រួលគ្រប់គ្រង។ ម្យ៉ាងទៀតដោយមានការជំរុញលើកទឹកចិត្ត ពីមិត្តភ័ក្ដិរួមអាជីព ដូចជា កញ្ញា សុខ ពិសី និង លោក ខេមរៈ សិរីមន្ត ជាដើមធ្វើឲ្យលោកមានកម្លាំងចិត្ត។តារាសម្ដែងរូបនេះនិយាយទៀតថា ការចូលហ៊ុនយូរៗទៅ លោកខ្លាចមានទំនាស់ទាស់ទែង ដែលធ្វើឲ្យមើលមុខគ្នាមិនត្រង់ទៅថ្ងៃក្រោយ។ ផ្សេងពីនេះ លោកខ្លាចប៉ះពាល់ដល់កិត្តិយសតារាដែលចូលមកថតរូប នៅពេលដែលយើងបែកបាក់ ឬមានការទាស់ពីបញ្ហាអ្វីមួយ ទើបធ្វើឲ្យលោកសម្រេចចិត្ត បើកហាងដោយផ្ទាល់ខ្លួន។
ហាងដែលបើកថ្មីនេះ បានចំណាយទឹកប្រាក់អស់ប្រហែល២ម៉ឺនដុល្លារឯណោះ។ លោកបន្តថាប្រាក់បើកហាងហ្នឹង គឺបានមកពីការលក់ដីមួយកន្លែង នៅឯខេត្តកំពង់ចាម និងមានការជួយជ្រោមជ្រែងបន្ថែមពីម្ដាយរបស់លោក។ “ការបើកហាងនេះមិនមានការជួយជ្រោមជ្រែង ពីនរណាមួយនោះទេ ខ្ញុំបើកដោយកម្លាំងញើសឈាមរបស់ខ្ញុំផ្ទាល់”។ នេះជាការអះអាងរបស់លោក ស៊ឹម សុរ៉ាមភូមិ។
លោក ស៊ឹម សុរ៉ាមភូមិ គ្រោងនឹងបើកដំណើរការហាងថ្មីនេះ នៅពាក់កណ្ដាលខែកុម្ភៈឆ្នាំ២០១១ ខាងមុខ។ ការសម្ពោធហាងហ្នឹង ត្រូវបានលោកនិយាយថានឹងធ្វើក្នុងទ្រង់ទ្រាយធំគួរសម ដែលពេលនោះនឹងមានតារាជាច្រើនចូលរួម៕
ចំណាត់ក្រុម ៖ពត៌មានកម្សាន្ត
កសិករឥណ្ឌាជាង១៧.០០០នាក់ធ្វើអត្ដឃាតក្នុង១ឆ្នាំ
ខែមករា 18, 2011
បញ្ចេញមតិ
តាមទីភ្នាក់ងារព័ត៌មាន AFP បាន ប្រកាសឱ្យដឹងថា តាមតួលេខរបស់រដ្ឋាភិបាលឥណ្ឌាដែលទើបតែប្រកាសនា ពេលកន្លងមកថ្មីបង្ហាញឱ្យឃើញថា មានប្រជាកសិកររហូតដល់ជាង១៧.០០០នាក់ បានធ្វើអត្ដឃាតក្នុង១ឆ្នាំៗ គឺកើន ឡើង៧ភាគរយ បើប្រៀបធៀបឆ្នាំកន្លងមក ។
តាមអង្គការស្រាវជ្រាវដែលមានឈ្មោះថា “ហេតុការណ៍ស្លាប់ដោយធ្វើ អត្ដឃាតនិងគ្រោះថ្នាក់របស់ក្រសួងស៊ើប អង្កេតអំពូអ្នកទោសជាតិ (NCRB ) បង្ហាញឱ្យឃើញថា ការធ្វើអត្ដឃាតមានការកើនឡើងខ្ពស់ ក្នុងនោះ ប្រជា ជនដែលរស់នៅក្នុងរដ្ឋ Maharashtra , Karnataka និង Andhra Pradesh ដែលមានអ្នកធ្វើអត្ដឃាតច្រើនជាងគេបំផុត។
ប្រជាពលរដ្ឋដែលរស់នៅតាមបណ្ដា រដ្ឋភាគខាងលិចនិងភាគខាងត្បូងមាន ជីវភាពរស់នៅកាន់តែយ៉ាប់យ៉ឺន ធ្វើឱ្យ ពួកគេជំពាក់បំណុលកាន់តែច្រើនឡើងៗ ក្រោយពេលផលដំណាំស្រែចំការខូចខាត មិនអាចប្រមូលផលបាន ។ គ្រោះរាំង ស្ងួតក្នុងប្រវត្ដិសាស្ដ្ររយៈពេល៣៧ឆ្នាំ ធ្វើឱ្យស្រែចំការហួតហែង មិនអាចប្រកបរបរស្រែចំការបាន ហើយពលរដ្ឋ ភាគច្រើនអាស្រ័យទៅនឹងផលដំណាំដើម្បីចិញ្ចឹមជីវិត ។
ទោះបីសេដ្ឋកិច្ចនៅតាមទីក្រុងមាន ការអភិវឌ្ឍរីកចម្រើន ប៉ុន្ដែពលរដ្ឋឥណ្ឌា ២ក្នុងចំណោម៣នាក់ រស់នៅនិងធ្វើការ នៅតាមជនបទដោយមានប្រាក់កំរៃតិចតួច ។ ប្រជាកសិករឥណ្ឌា១៥០.០០០នាក់ ធ្វើអត្ដឃាតរយៈពេល១០ឆ្នាំកន្លង មកនេះ ។
ពលរដ្ឋធ្វើអត្ដឃាតដោយប្រាក់ បំណុល បានក្លាយជាប្រធានបទដ៏សំខាន់ របស់ខ្សែភាពយន្ដ Bollywood ដ៏ល្បីល្បាញ ដែលបានចាក់ផ្សាយកាលពីឆ្នាំ ២០១០កន្លងមក មានចំណងជើងថា “Peepli Live ” ។ ខ្សែភាពយន្ដនោះ និយាយអំពីប្រជាកសិករក្រីក្រ ២រូប ត្រូវបាត់បង់ដីធ្លីស្រែចំការ ដោយប្រាក់បំណុល ដែលគ្មានសមត្ថភាពសងបាន ដោយសារតែគ្រោះរាំងស្ងួត ហើយមានមនុស្សម្នាក់បម្រុងធ្វើអត្ដឃាត ដើម្បីគ្រួសារទទួលបានប្រាក់សំណង ។
តាមតួលេខដែលបានស្រាវជ្រាវបង្ហាញឱ្យឃើញថា កាលពីឆ្នាំ២០០៩ មានអ្នកធ្វើអត្ដឃាតរហូតដល់១២៧.១៥១នាក់ ក្នុងនោះមាន១២៥.០០០នាក់ ស្លាប់តាមដងផ្លូវដែលមានគ្រោះថ្នាក់។ ក្នុង១ថ្ងៃៗ ឥណ្ឌាមានអ្នកស្លាប់ប្រមាណ ៣៥០នាក់ ។
ចាប់តាំងពីឆ្នាំ២០០៥មក គ្រោះថ្នាក់ចរាចរបានសម្លាប់មនុស្សកើនឡើង៣០ភាគរយ ខណៈដែលរថយន្ដដឹក ជញ្ជូនកើនឡើងរហូតដល់៣០ភាគរយផងនោះ ។
តាមការស្រាវជ្រាវមួយដែលបានផ្សព្វផ្សាយនៅលើទស្សនាវដ្ដី “The Lancet ” របស់អង់គ្លេសកាលពីសបា្ដហ៍មុនបង្ហាញ ឱ្យឃើញថា សេដ្ឋកិច្ចរីកចម្រើន ក៏ជា មូលហេតុគ្រោះថ្នាក់កើនឡើងខ្ពស់ ដូចជាបើកបរលឿន ដោយមិនយកចិត្ដទុក ដាក់លើសុវត្ថិភាពជាចម្បង ។
តាមតួលេខកាលពីឆ្នាំ២០០៩ មាន អ្នកស្លាប់ដោយការអត់ឃ្លាន១៧៥នាក់ស្លាប់ដោយការវាយប្រហារគ្រាប់បែក ២៦១នាក់ ស្លាប់ដោយលង់ទឹក២៥.៩១១នាក់ ស្លាប់ដោយឆក់អគ្គិសនី៨.៥៣៩ នាក់ ស្លាប់ដោយពោះចិក៨.០០០នាក់ ៕
ចំណាត់ក្រុម ៖ព្រឹត្តិការណ៏អន្តរជាតិ
ច្បាប់ប្រឆាំងអំពើពុករលួយបញ្ចេញឥទ្ធិពលលឿន និងឆាប់រហ័ស
ខែមករា 17, 2011
មតិ 2
ស្ថាប័នប្រឆាំងអំពើពុករលួយកំពុងធ្វើឲ្យរំជើបរំជួលពេញផ្ទៃ ប្រទេសតាមរយៈការគាស់រំលើងខ្សែបណ្តាញជនពុករលួយនៅក្នុងជួរ មន្ត្រីដែលមានបុណ្យស័ក្តិហើយប្រើប្រាស់តួនាទីរបស់ខ្លួនដើម្បី ប្រព្រឹត្តអំពើពុករលួយគួរឲ្យព្រឺខ្លាច។ បន្ទាប់ពីវាយលុកទៅលើមន្ត្រីតុលាការតាមរយៈការចាប់ខ្លួនព្រះរាជ អាជ្ញាខេត្តពោធិសាត់កាលពីចុងខែវិច្ឆិកាឆ្នាំ២០១០ ឥឡូវនេះដល់វេនមន្ត្រី ប្រឆាំងគ្រឿងញៀនវិញម្តង។ មន្ត្រីប៉ូលិសចាប់ពីស័ក្តិ៥រហូតដល់ផ្កាយ៣ជាច្រើននាក់ត្រូវបាន ចាប់ខ្លួនជាបន្តបន្ទាប់ពីបទពាក់ពន្ធ័នឹងអំពើពុករលួយ។ តើព្រឹត្តិការណ៍នេះមានអត្ថន័យជាសារនយោបាយយ៉ាងដូចម្តេចខ្លះ?
ច្បាប់ប្រឆាំងអំពើពុករលួយកំពុងបញ្ចេញឥទ្ធិពលយ៉ាងខ្លាំងសម្បើមក្នុងរយៈពេលចុងក្រោយនេះ។ឥទ្ធិពលរបស់វាបាននិងកំពុងធ្វើឲ្យឧត្តមសេនីយ៍ និងវរសេនីយ៍ប៉ូលិសមួយចំនួនធ្លាក់ផ្កាយនិងស័ក្តិចេញពីស្មាជាបន្តបន្ទាប់។ លើសពីនេះ ពួកគេនឹងត្រូវប្រឈមមុខនឹងការផ្តន្ទាទោសយ៉ាងធ្ងន់ធ្ងរដោយច្បាប់ប្រឆាំងអំពើពុករលួយដែលទើបតែចូលជាធរមានកាលពីពេលថ្មីៗបំផុតនេះ។
ពិតណាស់ថា ច្បាប់ប្រឆាំងអំពើពុករលួយហាក់ដូចជាត្រូវបានគេអនុវត្តយ៉ាងសកម្មនិងយ៉ាងលឿនទៀតផងបើធៀបទៅនឹងច្បាប់ផ្សេងៗពីព្រោះថាការផ្តើមចាប់ខ្លួនមន្ត្រីធំៗមានបុណ្យស័ក្តិដែលគ្មានអ្នកណានឹកស្មានដល់ត្រូវបានគេអនុវត្តភ្លាមៗខណៈដែលស្ថាប័នប្រឆាំងអំពើពុករលួយទើបតែដំណើរការផ្សព្វផ្សាយច្បាប់និងនីតិវិធីនៃការប្រកាសទ្រព្យសម្បត្តិមិនទាន់ទាំងចប់សព្វគ្រប់ផង។
ព្រឹត្តិការណ៍ដំបូងដែលធ្វើឲ្យកក្រើកក្នុងក្របខ័ណ្ឌនៃច្បាប់ប្រឆាំងអំពើពុករលួយបានកើតឡើងកាលពីចុងខែវិច្ឆិកាឆ្នាំ២០១០។ នោះគឺការចាប់ខ្លួនលោកតុប ចាន់សិរីវុឌ្ឍព្រះរាជអាជ្ញាអមតុលាការខេត្តពោធិសាត់ដោយអង្គភាពប្រឆាំងអំពើពុករលួយ។ ឥឡូវនេះ ព្រឹត្តិការណ៍ដ៏កក្រើកបានកើតឡើងម្តងទៀតក្នុងការចាប់ខ្លួនមន្ត្រីគ្រាក់ៗក្នុងស្ថាប័នប៉ូលិសពីបទពុករលួយ។
ឧត្តមសេនីយ៍ប៉ូលិសដែលត្រូវបានគេចាប់ខ្លួននៅក្នុងសំណុំរឿងនេះមានលោកហ៊ុន ហ៊ាន ស្នងការប៉ូលិសខេត្តបន្ទាយមានជ័យមានឋានៈជាឧត្តមសេនីយ៍ផ្កាយ១ និងលោកមឹក ដារ៉ា អគ្គលេខាធិការអាជ្ញាធរជាតិប្រឆាំងគ្រឿងញៀនដែលពាក់ផ្កាយដល់ទៅ៣នៅលើស្មា។
សម្រាប់ក្រសែភ្នែកក្រុមអ្នកវិភាគ ព្រឹត្តិការណ៍នេះមានអត្ថន័យជាសារនយោបាយសំខាន់២៖ ទី១៖ គឺជាសារដែលបង្ហាញថាអ្នកប្រព្រឹត្តអំពើពុករលួយទាំងឡាយល្មមដល់ពេលឆ្អែតឆ្អន់ហើយពីព្រោះថាប្រសិនបើមិនដូច្នោះទេពួកគេនឹងមិនអាចគេចផុតពីសំណាញ់ច្បាប់ឡើយ។ សារទី២៖ គឺជាការបង្ហាញដល់អ្នករិះគន់ទាំងឡាយថា ពួកគេកំពុងតែគិតខុសពីព្រោះថាអង្គភាពប្រឆាំងអំពើពុករលួយគឺជាមាន់ជល់យ៉ាងពិតប្រាកដ មិនមែនមាន់សម្លដូចគេគិតនោះឡើយ។ សូម្បីតែឧត្តមសេនីយ៍ផ្កាយ៣លើស្មាក៏គេអាចចាប់ខ្លួនបានដែរ។
ព្រឹត្តិការណ៍នេះមានសារៈសំខាន់ទាំងលើទិដ្ឋភាពសង្គម និងទិដ្ឋភាពនយោបាយ។ នៅលើ ទិដ្ឋភាពសង្គម ការកម្ចាត់អំពើពុករលួយជាបេសកកម្មដ៏ចម្បងមួយសម្រាប់សង្គមខ្មែរដែលរីងរៃដោយសារតែដំបៅមហារីកនៃអំពើពុករលួយជាយូរមកហើយ។ ដូច្នេះដើម្បីព្យាបាលសង្គមនេះឲ្យមានកម្លាំងពលំឡើងវិញ វាចាំបាច់ណាស់ដែលត្រូវធ្វើសង្គ្រាមប្រឆាំងនឹងអំពើពុករលួយដោយចាប់ផ្តើមពីថ្នាក់លើជាគំរូ។
នៅលើទិដ្ឋភាពនយោបាយវិញ ព្រឹត្តិការណ៍នេះបង្ហាញឲ្យឃើញថា គណបក្សកាន់អំណាចពិតជាហ៊ានវះកាត់សាច់ដំបៅមហារីកបោះចោលបើទោះបីជាវាធ្វើឲ្យខ្លួនឈឺចាប់បន្តិចក្តី។ ឆន្ទៈនយោបាយបែបនេះដែលគេទន្ទឹងរង់ចាំជាយូរមកហើយ មានសារៈសំខាន់ខ្លាំងណាស់
សម្រាប់ការលះបង់ប្រយោជន៍បក្សពួកដើម្បីប្រយោជន៍ជាតិ។
ប៉ុន្តែ សម្រាប់ពេលនេះវាហាក់ដូចជានៅឆាប់ពេកណាស់ក្នុងការធ្វើសេចក្តីសន្និដ្ឋានអំពីប្រសិទ្ធិភាពនៃច្បាប់ប្រឆាំងអំពើពុករលួយក៏ដូចជាអំពីឆន្ទៈរបស់រដ្ឋាភិបាលក្នុងការប្រយុទ្ធប្រឆាំងនឹងអំពើពុករលួយដែរ។ សុភាសិតបារាំងមួយបានពោលថា«អ្វីដែលកើតមួយដងមួយ កាលមិនមែនជាទម្លាប់ទេ»។ ក្នុងន័យនេះ គេប្រហែលជាត្រូវការពេលយូរទៀតដើម្បីតាមដាន មើលថាតើអង្គភាពប្រឆាំងអំពើពុករលួយនឹងធ្វើឲ្យការបង្ក្រាបអំពើពុករលួយទ្រង់ទ្រាយធំបែបនេះក្លាយទៅជាទម្លាប់និងស្មើភាពគ្នារហូតដែរឬទេ?
យ៉ាងណាក៏ដោយចុះ សកម្មភាពរបស់អង្គភាពប្រឆាំងអំពើពុករលួយនៅពេលនេះគឺជាទង្វើដែលគួរឲ្យលើកទឹកចិត្ត និងគួរជាទីសង្ឃឹម។ ប្រសិនបើសកម្មភាពបែបនេះនៅតែបន្តមែននោះ គេជឿជាក់ថាសង្គមខ្មែរនឹងស្គាល់ការវិវឌ្ឍន៍ក្នុងដំណាក់កាលថ្មីមួយប្រកបដោយនីតិរដ្ឋ។ ប៉ុន្តែបើការចាប់ផ្តើមមានតែមួយប្រាវហើយស្ងាត់ទៅវិញនោះ ការរិះគន់ពីដើមទីនឹងនៅតែក្លាយជាការពិតតែដដែល៕
ចំណាត់ក្រុម ៖ព្រឹត្តិការណ៏ជាតិ
ឈ្មោះបរទេសកំពុងវាយលុកគ្រួសារខ្មែរ
ខែមករា 17, 2011
មតិ 5
មាននិន្នាការថ្មីមួយ បានកំពុងកើតមាននៅក្នុងសង្គមគ្រួសារខ្មែរ។ ឪពុកម្តាយមួយចំនួន ស្រាប់តែមានចំណង់ចង់ដាក់ឈ្មោះកូនជាភាសាបរទេស។ មិនខុសពីការដាក់ឈ្មោះកូនជាភាសាខ្មែរនោះទេ។ ក្រៅពីភាពពិរោះនៃឈ្មោះនោះ ឪពុកម្តាយដែលដាក់ឈ្មោះកូន ជាឈ្មោះបរទេសនោះ គ្រាន់តែសង្ឃឹមថាកូនៗរបស់ពួកគេនឹងបានល្បី និងពូកែដូចតួអង្គដែលពួកគេពេញចិត្ត។ អ្នកវិភាគខ្លះនិយាយថា ការដាក់ឈ្មោះកូនជាឈ្មោះបរទេស បានបង្ហាញអំពីការទទួលឥទិ្ធពលវប្បធម៌បរទេសមួយទៀត។
ចំណាត់ក្រុម ៖ជីវិតនិងសង្គម
អ្នកទោសម្នាក់ដាក់ពាក្យប្តឹងប្រធានពន្ធនាគារដោយសារកណ្តុរខាំប្រដាប់ភេទខ្លួន
ខែមករា 17, 2011
មតិ ១
អ្នកទោសជនជាតិវៀតណាមម្នាក់អាយុ៥៤ឆ្នាំ អះអាងថា ខ្លួននឹងដាក់ពាក្យបណ្តឹងប្តឹងប្រធានពន្ធនាគារមួយនៅក្នុងទីក្រុង Nassau ប្រទេសបាហាម៉ាស់ ក្រោយពីមានសត្វកណ្តុរមួយក្បាលខាំប្រដាប់ភេទរបស់គាត់ក្នុងពន្ធនាគារនោះ ។ អ្នកទោសរូបនេះដែលស្នើសុំមិនបញ្ចេញឈ្មោះនិយាយថា រូបគេត្រូវសត្វកណ្តុរខាំប្រដាប់ភេទនៅក្នុងយប់មួយ ហើយគាត់នឹងប្តឹងប្រធានពន្ធនាគារនោះទារប្រាក់សំណងជំងឺចិត្តពីបទមិនការពារគាត់នៅក្នុងពន្ធនាគារ ។
បុរសនេះត្រូវបានកាត់ទោសដាក់ពន្ធនាគារតាំងពីខែកុម្ភៈ ឆ្នាំ២០០៧ មក ពីបទប្រព្រឹត្តអំពើហិង្សាក្នុងគ្រួសារ ៕
ចំណាត់ក្រុម ៖ព្រឹត្តិការណ៏អន្តរជាតិ
៥១នាក់ស្លាប់និងជាង១លាននាក់ទៀតរងផលប៉ះពាល់
ខែមករា 17, 2011
បញ្ចេញមតិ
ដោយសារភ្លៀងធ្លាក់បានអូសបន្លាយជាយូរ ហើយបណ្ដាលឲ្យមានព្យុះទឹកជំនន់សម្លាប់មនុស្ស៥១នាក់នៅហ្វីលីពីន។ នេះដោយយោងទៅតាមភ្នាក់ងារគ្រោះមហន្តរាយហ្វីលីពីនបង្ហាញក្នុងថ្ងៃនេះ។
ភ្លៀងបានបន្តធ្លាក់នៅលើកោះLuzon ជាច្រើនថ្ងៃហើយបានសម្លាប់មនុស្សជាង៥០នាក់។ ជាងនេះទៅទៀត នៅមានមនុស្ស១២នាក់បានបាត់ខ្លួននៅឡើង និង៨នាក់ទៀតរងរបួសដោយសារតែការបាក់ដីនិងចរន្តអគ្គិសនី។ គ្រោះធម្មជាតិ ដែលរួមមានទឹកជំនន់និងព្យុះនេះ បានបន្តកើតជាច្រើនសប្ដាហ៍មកហើយ តាំងតែពីថ្ងៃទី២៩ខែធ្នូមកម្ល៉េះ ដែលក្នុងនោះ មានខេត្តចំនួន២៥ត្រូវបានជោរជន់ដោយទឹក។ ព្យុះទឹកជំនន់នេះជះផលអាក្រក់ដល់ប្រជាជន១៦០០០០០នាក់ ប្រហែលជាជាង៣០០០០០គ្រួសារ។
យោងតាមភ្នាក់ងារគ្រោះមហន្តរាយបានបង្ហាញថា គ្រោះធម្មជាតិដ៏អាក្រក់នេះ បានធ្វើឲ្យផ្ទះជាង៥០០ខ្នងនិងហេដ្ឋារចនាសម្ព័ន្ធជាច្រើនទៀតត្រូវបានបំផ្លាញ ដែលសរុបជាសាច់ប្រាក់អស់ប្រហែលជា៩.៥លានដុល្លារ។
ចំណាត់ក្រុម ៖ព្រឹត្តិការណ៏អន្តរជាតិ
អតិថិជន៖ គុណភាពទំនិញមិនសូវគិត ប៉ុន្តែបញ្ហាគឺតម្លៃ
ខែមករា 17, 2011
បញ្ចេញមតិ
ការដាក់លក់ផលិតផលអេឡិចត្រូនិកដែលត្រូវបានគេបន្លំយីហោនៅលើទីផ្សារកម្ពុជា គឺជាបញ្ហាដ៏ធំមួយដែលកំពុងតែកើតមាន នៅក្នុងប្រទេសនេះហើយដែលរហូតមកដល់ពេលនេះនៅមិនទាន់ត្រូវបានដោះស្រាយនៅឡើយទេ។ អ្វីដែលជាដំណឹងល្អនោះ គឺកម្ពុជាមិននៅឯកោទេ។
ក្រុមអ្នកពង្រឹងការអនុវត្តច្បាប់មកពីប្រទេសចំនួន ១១ បានជួបជុំគ្នានៅរាជធានីភ្នំពេញ កាលពីសប្តាហ៍មុន ដើម្បីចែករំលែកមតិយោបល់គ្នាអំពីវិធីសាស្ត្រក្នុងការបង្ក្រាបលើការក្លែងបន្លំទំនិញរឹងនេះ។ ប៉ុន្តែ បើយោងតាមលោក ស៊ីម សុខេង អនុប្រធាននាយកដ្ឋានកម្មសិទ្ធិបញ្ញារបស់ក្រសួងពាណិជ្ជកម្ម មិនមានដំណោះស្រាយណាមួយបានត្រូវគេរកឃើញនោះទេ។
លោកបានថ្លែងថា ៖«នេះគឺជាបញ្ហាមួយ។ ប៉ុន្តែគ្រប់ប្រទេសទាំងអស់កំពុងតែប្រឈមមុខទៅនឹងបញ្ហាដូចគ្នានេះដែរ សូម្បីតែនៅសហរដ្ឋអាមេរិក មិនមែនមានតែកម្ពុជាយើងនោះទេ។ នៅក្នុងសិក្ខាសាលានោះយើងបានពិភាក្សាអំពីបញ្ហានោះ ប៉ុន្តែបើនិយាយដល់ដំណោះស្រាយ យើងនៅមិនទាន់រកឃើញដំណោះស្រាយណាមួយឲ្យច្បាស់លាស់នៅឡើយទេ។
តែទោះយ៉ាងណាយើងបានយល់ស្របគ្នានៅក្នុងសិក្ខាសាលានោះថា មធ្យោបាយដែលល្អបំផុតសម្រាប់ដោះស្រាយបញ្ហានេះ គឺថា យើងមិនត្រូវប្រយុទ្ធប្រឆាំងជាមួយនឹងបញ្ហានេះតែម្នាក់ឯងនោះទេ។ យើងត្រូវតែបង្កើតបណ្តាញមួយនៅក្នុងចំណោមទីភ្នាក់ងារពង្រឹងការអនុវត្តច្បាប់ ក្រុមអ្នកស៊ើបអង្កេត នគរបាល ហើយធ្វើការដោះស្រាយរួមគ្នាព្រោះថា ទំនិញត្រូវបាននាំមកពីប្រទេសផ្សេងៗ»។
អ្នកតាមដានការពង្រឹងការអនុវត្តច្បាប់ និងក្រុមព្រះរាជអាជ្ញាសរុបជាង ៥០ រូបបានអញ្ជើញចូលរួមនៅក្នុងសិក្ខាសាលាដែលមានរយៈពេលបីថ្ងៃស្តីអំពីការតាមដាន និងសម្រេចចំពោះការក្លែងបន្លំទំនិញរឹង និងការរំលោភលើកម្មសិទ្ធិបញ្ញាដោយលួចចម្លងស៊ីឌី។ បទបង្ហាញដោយតំណាងមកពីសហរដ្ឋអាមេរិក និងប្រទេសសិង្ហបុរីគឺជាចំណុច ដែលគួរឲ្យចាប់អារម្មណ៍សំខាន់ជាងគេ។ នេះបើតាមការបញ្ជាក់របស់លោក ស៊ីម សុខេង។ លោកបានថ្លែងថា៖«ពួកគេមានបទពិសោធល្អៗក្នុងការដោះស្រាយបញ្ហានេះ។ យើងក៏ទៅចូលរួមដើម្បីស្តាប់ និងរៀនពីពួកគេដែរ»។
ប៉ុន្តែបើទោះជាមានវត្តមានរបស់ប្រទេសដែលមានបទពិសោធទាំងនេះ ក៏ដោយ ក៏ មិនមានដំណោះស្រាយណាមួយត្រូវបានគេរកឃើញនៅឡើយនោះទេ។ មួយផ្នែកគឺដោយសាររាជរដ្ឋាភិបាលមិនដឹងថា តើបញ្ហានោះវាមានទំហំប៉ុនណា ឬក៏ថាវា ជះឥទ្ធិពលលើអ្នកចែកចាយទំនិញពិតប្រាកដនៅកម្ពុជាប៉ុនណានោះទេ។ លោក ស៊ីម សុខេង បានមានប្រសាសន៍ថា៖«យើងនៅមិនទាន់ទទួលបានតួលេខទាំងនោះនៅឡើយទេ ដោយសារតែយើងនៅមិនទាន់បានប្រមូលទិន្នន័យនេះឲ្យបានពេញលេញនៅឡើយ។ យើងនឹងព្យាយាមរកវាឲ្យបានឥឡូវនេះព្រោះថា អ្នកពង្រឹងការអនុវត្តច្បាប់ត្រូវតែស្គាល់ខ្លូនឯងដើម្បីបង្កើតជាបណ្តាញជាមួយប្រទេសផ្សេងទៀត»។
នាយកផ្នែកទីផ្សារបស់ក្រុមហ៊ុនចែកចាយផលិតផលអេឡិចត្រូនិកឈ្មោះ ស៊ុនស៊ីម៉ិចកូ លោក តាំង សុធារិទ្ធ បានឲ្យដឹងថា ទូរទស្សន៍ក្លែងបន្លំម៉ាកសញ្ញាប្រហែលជា៥ពាន់គ្រឿង និងក្បាលDVDក្លែងបន្លំប្រហែលជា១ម៉ឺនគ្រឿង ត្រូវបានគេចែកនៅក្នុងទីផ្សារកម្ពុជាជារៀងរាល់ខែ។ លោកយល់ថា ទំនិញទាំងនេះត្រូវបាននាំចូលជាពិសេសក្នុងសភាពជាគ្រឿងរាយដាច់ដោយឡែកពីគ្នា ហើយត្រូវបានដំឡើងនៅស្រុកខ្មែរដើម្បីជៀសវាងការបង់ពន្ធនាំចូល។ លោកបន្ថែមទៀតថា ក្បាល DVD គឺជាទំនិញមួយដែលមានការពេញនិយមជាងគេសម្រាប់អ្នកក្លែងបន្លំព្រោះថា ទំនិញនេះមានតម្រូវការខ្ពស់នៅក្នុងចំណោមអ្នកប្រើប្រាស់ហើយការផលិតទំនិញនេះចំណាយតិច។
ការមិនសប្បាយចិត្តរបស់លោក តាំង សុធារិទ្ធ ចំពោះទំនិញក្លែងបន្លំ គឺមិនមែនដោយសាររឿងបាត់បង់ប្រាក់ចំណេញនោះទេ ប៉ុន្តែវាគឺជារឿងបាត់បង់ឱកាស។ លោកបាននិយាយថា ៖ «យើងមិនខាតប្រាក់ទេ ប៉ុន្តែយើងប្រឈមមុខនឹងការបាត់បង់ទីផ្សារ ព្រោះថា អតិថិជននឹងលែងទុកចិត្តលើគុណភាពរបស់យើង។ ពួកគេទិញទំនិញក្លែងក្លាយ ហើយពីរ ឬបីខែក្រោយមកទំនិញនោះក៏ខូច ឬវាពិបាកប្រើប្រាស់ នៅពេលនោះពួកគេនឹងឆ្ងល់ថា ហេតុអ្វីក៏វាអន់យ៉ាងនេះ ហើយពួកគេក៏ឈប់ជឿលើយីហោទំនិញនេះទៀត»។
ទោះយ៉ាងណា សម្រាប់អតិថិជនយីហោប្រហែលជាមិនសូវជាបញ្ហាទេ។ បញ្ហាគឺតម្លៃ។ លោក នៅ ពិធូ អាយុ២៨ឆ្នាំ បាននិយាយថា ពីមុនលោកធ្លាប់ទិញទំនិញក្លែងក្លាយ ទាំងដឹងថាវាក្លែងក្លាយដោយសារតែវាជាជម្រើស ដែលថោកជាង។ លោកបាននិយាយថា៖«យើងដឹងថាវាមិនមែនជាម៉ាក Sony ពិតប្រាកដនោះទេ។ យើងមិនខ្វល់ទេថា តើវាជាម៉ាក Sony មែនឬយ៉ាងណានោះ។ គ្រាន់តែឃើញតម្លៃថោក យើងក៏ទិញវាទៅ»។
លោកបានបន្តទៀតថា ប្រជាពលរដ្ឋខ្មែរជាច្រើនមិនមានជម្រើសអ្វីក្រៅពីទិញរបស់ក្លែងក្លាយដោយមិនខ្វល់អំពីការប្រថុយប្រថានទាក់ទងនឹងគុណភាពនោះទេ។ លោកបានអះអាងថា៖«ខ្ញុំអាចនិយាយបានថា ខ្ញុំមានចំណូលគ្រាន់បើដែរ ប៉ុន្តែខ្ញុំនៅចង់ទិញទំនិញផលិតនៅប្រទេសចិនជាងទំនិញមកពីប្រទេសជប៉ុន គឺដោយសារតែរឿងតម្លៃនេះឯង។ យើងដឹងថា ការប្រើប្រាស់ផលិតផលរបស់ប្រទេសចិន វាប្រឈមមុខនឹងការប្រថុយប្រថានច្រើន ប៉ុន្តែយើងនឹងនៅតែប្រើប្រាស់វា»។
លោកបានបន្តថា របស់ក្លែងបន្លំដែលគេចូលចិត្តទិញបំផុត គឺទូរទស្សន៍ និងក្បាល DVD ព្រោះថារបស់ក្លែងក្លាយអស់ទាំងនេះវាថោកជាងទំនិញពិតប្រាកដច្រើន ចំណេកឯការទិញរបស់ក្លែងបន្លំខ្លះទៀតដូចជា ទូទឹកកក និងម៉ាស៊ីនត្រជាក់វិញ មិនសូវធ្វើឲ្យយើងអាចកាត់បន្ថយចំណាយដូចទិញទូរទស្សន៍ និងក្បាល DVD នោះទេ។ លោកបានថ្លែងថា ក្បាលDVD ម៉ាក Sony ពិតប្រាកដមួយអាចមានតម្លៃរហូតដល់ទៅ២០០ដុល្លារ ចំណែករបស់ដូចគ្នានេះដែលផលិតមកពីប្រទេសចិនវិញមានតម្លៃត្រឹមតែ ១០០ ដុល្លារតែប៉ុណ្ណោះ ហើយមានខ្លះទៀតថោករហូតដល់ត្រឹមតែ៣០ ដុល្លារគត់។
លោកថា៖ «ផលិតផលមកពីប្រទេសជប៉ុនមួយអាចមានតម្លៃស្មើ និងផលិតផលមកពីប្រទេសចិនដល់ទៅ១០ ឬ២០ឯណោះ។ នេះហើយជាមូលហេតុដែលយើងទិញផលិតផលចិននោះ»៕
ចំណាត់ក្រុម ៖ជីវិតនិងសង្គម
Apple បង្កើនសមត្ថភាពDevice?
ខែមករា 17, 2011
បញ្ចេញមតិ
ក្រុមហ៊ុន Apple បានសម្រេចកែប្រែឧបករណ៍អេឡិចត្រូនិករបស់ខ្លួនជាច្រើន ជាក់ស្ដែង Apple បានបំពាក់ប្រព័ន្ធបណ្ដាញ Dual GSM-CDMAឲ្យ iPhone 3GS។ ទន្ទឹមគ្នានេះដែរ Resolution និងរន្ធដោតមេម៉ូរីខាងក្រៅរបស់ iPad ក៏ត្រូវបានApple កំណត់ពីចន្លោះប្រហោង ជាស្រេចហើយដែរ។ មិនមែនមានតែប៉ុណ្ណឹងទេ Apple TV ត្រូវបានបំពាក់ដោយ Processor A5 ដែលមានសមត្ថភាពអាចចាប់យករូបភាពជាវីដេអូបានក្នុងកម្រិតខ្ពស់គឺ រហូតដល់ទៅ 1080ភិកសេល។
ថ្មីៗនេះមានលេចឭពាក្យចចាមអារ៉ាមថា Apple មានគម្រោងបំពាក់ Processor ថ្មីឲ្យ iPhone 5 គឺមិនទាន់ដឹងច្បាស់ថាប្រភេទណានៅឡើយទេ។ iPhone 4 ប្រើប្រាស់ Processor A4 ក្នុងល្បឿន 1GHz ដូចគ្នានឹង Processor របស់ iPad ដែរ។ ដោយសារតែមានការប្រកួតប្រជែងគ្នាកាន់តែខ្លាំងឡើង Apple ប្រហែលជាសម្រេចចិត្តជ្រើសរើស dual-core chip ឬ CPU ដែលមានល្បឿនជាង A4 សម្រាប់បំពាក់ឲ្យ iPhone 5 និង iPad 2 ដែលគ្រោងចេញលក់នៅថ្ងៃខាងមុខ៕
ចំណាត់ក្រុម ៖ពត៌មានបច្ចេកវិទ្យា
ការប្រើប្រាស់គ្រឿងអេឡិចត្រូនិកកើនឡើងខ្លាំងនៅកម្ពុជា
ខែមករា 17, 2011
បញ្ចេញមតិ
ចាប់តាំងពីមានការពង្រីកការតភ្ជាប់បណ្តាញអគ្គិសនីថ្នាក់ជាតិ នៅក្នុងឆ្នាំ ១៩៩៥ ហើយនិងការកើនឡើងនូវកម្រិតជីវភាពខ្ពស់របស់ប្រជាពលរដ្ឋ នៅក្នុងឆ្នាំ ២០០៥ មកបានធ្វើឱ្យប្រទេសកម្ពុជាមានការវិវឌ្ឍយ៉ាងខ្លាំងទៅរកការ ប្រើប្រាស់នូវគ្រឿងអេឡិចត្រូនិកជាពិសេសនៅក្នុងតំបន់ទីប្រជុំជន។
មន្ត្រីរដ្ឋាភិបាលទទួលបន្ធុកផ្នែកថាមពលបាន និយាយថា ការវិវត្តនៃការប្រើប្រាស់គឿងអេឡិចត្រូនិកនេះមានគម្លាតគ្នាយ៉ាងខ្លាំងរវាងតំបន់ទីប្រជុំជន និងតំបន់ជនបទចុងកាត់មាត់ញកព្រោះថា ការបែងចែកថាមពលអគ្គិសនី នៅក្នុងពេលបច្ចុប្បន្នធ្វើឡើងនៅមានកម្រិត។
លោកវ៉ិច ទ័រហ្សូណា អគ្គនាយករងនៃក្រសួងឧស្សាហកម្ម រ៉ែ និងថាមពល បានថ្លែងថា សព្វថ្ងៃ ប្រជាពលរដ្ឋរស់នៅក្នុងតំបន់ទីប្រជុំជន ដែលបានទទួលការផ្គត់ផ្គង់អគ្គិសនីគ្រប់គ្រាន់ បានទិញសម្ភារអេឡិចត្រូនិកប្រើប្រាស់មានដូចជាទូរទស្សន៍ ទូទឹកកក ម៉ាស៊ីនត្រជាក់ ម៉ាស៊ីនបោកគក់សម្លៀកបំពាក់ ឆ្នាំងដាំបាយហើយនិងឧបករណ៍ផ្សេងៗជាច្រើនទៀតខុសគ្នាពីអ្នករស់នៅតំបន់ជនបទដែលខ្វះប្រភពថាមពល ដែលមានលទ្ធភាពប្រើត្រឹមទូរទស្សន៍ និងម៉ាញ៉េប៉ុណ្ណោះ។
លោក វ៉ិច ទ័រហ្សូណា ថ្លែងថា ៖ «យើងឃើញមានការប្រើប្រាស់សម្ភារអេឡិចត្រូនិកនេះខុសគ្នាខ្លាំងណាស់រវាងទីប្រជុំជនក្រុង និងទីជនបទព្រោះថាបណ្តាញតភ្ជាប់ថាមពលរបស់យើងមិនអាចមានលទ្ធភាពបញ្ជូនចរន្តអគ្គិសនីទៅកាន់តំបន់ ឆ្ងាយៗបាន»។
បច្ចុប្បន្នប្រជាពលរដ្ឋកម្ពុជាប្រមាណ ៨៥ ភាគរយដែលរស់នៅក្នុងតំបន់ទីជនបទមានអគ្គិសនី ប្រើប្រាស់តែប្រមាណ ១០ ភាគរយប៉ុណ្ណោះហើយកត្តានេះបានជះឥទ្ធិពលធ្វើឱ្យមានគម្លាតគ្នាយ៉ាងខ្លាំង ដល់ការប្រើប្រាស់គ្រឿងអេឡិចត្រូនិករវាងទីប្រជុំជន និង ទីជនបទ។
លោក តាំង សុធារិទ្ធ នាយកទីផ្សាររបស់ក្រុមហ៊ុនស៊ុនស៊ីម៉ិចកូដែលជាក្រុមហ៊ុនលក់គ្រឿងអេឡិចត្រូនិកដ៏ធំនៅក្នុងប្រទេសបានឱ្យដឹងថា សព្វថ្ងៃអ្នករស់នៅក្នុងតំបន់ទីប្រជុំជនមានការទិញគ្រឿងអេឡិចត្រូនិកប្រើច្រើនជាងអ្នករស់នៅឯតំបន់ជនបទ។
លោកតាំង សុធារិទ្ធបាននិយាយថា ការតភ្ជាប់បណ្តាញអគ្គិសនី ហើយនិងការកើនឡើងនូវកម្រិតជីវភាពរបស់ប្រជាជនបានផ្តល់ឱកាសឱ្យក្រុមហ៊ុនធ្វើការលក់គ្រឿងអេឡិចត្រូនិកដែលរួមមានដូចជាម៉ាស៊ីនត្រជាក់ ទូទឹកកក ម៉ាស៊ីនបោកសម្លៀកបំពាក់ ទូរទស្សន៍ ឆ្នាំងដាំបាយ កាមេរ៉ា និងឆ្នាំងអ៊ុតជាដើម មានការកើនឡើងប្រមាណជា ៣០ ភាគរយក្នុងមួយឆ្នាំៗ។ លោក តាំង សុធារិទ្ធ បានមានប្រសាសន៍ថា ៖ «ខ្ញុំគិតថានៅពេលដែលជីវភាពរបស់ប្រជាពលរដ្ឋមានលក្ខណៈកាន់តែប្រសើរហើយមានការតភ្ជាប់បណ្តាញអគ្គិសនីថែមទៀតពេលនោះគ្រឿងអេឡិចត្រូនិក គឺជាតម្រូវការរបស់ពួកគេហើយ»។
យោងតាមក្រុមហ៊ុនស៊ុនស៊ីម៉ិចកូ បានឱ្យដឹងថា ក្នុងមួយខែៗមានគ្រឿងអេឡិចត្រូនិក ដូចជាទូរទស្សន៍ ទូទឹកកក និង ម៉ាស៊ីនត្រជាក់ជាដើមប្រមាណជាជាង ១០០០ គ្រឿងត្រូវបានគេលក់ទៅឱ្យអតិថិជន។ គ្មានស្ថិតិនៃការលក់គ្រឿងអេឡិចត្រូនិកក្នុងប្រទេស ត្រូវបានរាយការណ៍ដោយអាជ្ញាធរមានសមត្ថកិច្ចទេ។
លោកគួយ ឆៃសុង អាជីវករលក់ម៉ូតូនៅភូមិ ៦ សង្កាត់វាលវង់ ក្រុងកំពង់ចាម បាននិយាយថា សព្វថ្ងៃលោកចង់ធ្វើការទិញគ្រឿងអេឡិចត្រូនិកថ្មីៗដូចជាម៉ាស៊ីនត្រជាក់ និងកាមេរ៉ាសម្រាប់ថតឃ្លាំមើលសន្តិសុខជាដើម ដើម្បីប្រើនៅក្នុងផ្ទះប្រយោជន៍ជួយធ្វើឱ្យមានផាសុកភាព ហើយនិងសុវត្ថិភាពសម្រាប់ការធ្វើអាជីវកម្ម។ លោកគួយ ឆៃសុង បានថ្លែងថា៖«សព្វថ្ងៃផ្ទះរបស់ខ្ញុំមានទូរទស្សន៍ ម៉ាញ៉េ ទូទឹកកក និង ម៉ាស៊ីនបោកខោអាវប្រើរួចហើយ ប៉ុន្តែខ្ញុំនៅតែចង់ទិញរបស់ផ្សេងៗទៀតព្រោះថាយើងមានការផ្គត់ផ្គង់ថាមពលអគ្គិសនីគ្រប់គ្រាន់»។
ទាក់ទងនឹងបញ្ហានេះ លោកតាំង សុធារិទ្ធ បានពន្យល់ថា សព្វថ្ងៃអ្នករស់នៅទីប្រជុំជនភាគច្រើនទិញសម្ភារអេឡិចត្រូនិកដូចជាកាមេរ៉ា ទូទឹកកក ម៉ាស៊ីនត្រជាក់ម៉ាស៊ីនបោកគក់ និងឆ្នាំងដាំបាយហើយអ្នកនៅជនបទ ច្រើនទិញទូរទស្សន៍ និង ម៉ាញ៉េ។ លោកថ្លែងថា៖«សព្វថ្ងៃគ្រឿងអេឡិចត្រូនិក ដែលក្រុមហ៊ុនលក់ដាច់បំផុតមានទូរទស្សន៍ប្រភេទអិលស៊ីឌីទូទឹកកក និងម៉ាស៊ីនត្រជាក់»។
ក្រសួងឧស្សាហកម្មរ៉ែ និង ថាមពលបានឱ្យដឹងថា ក្នុងមួយឆ្នាំៗមានការផ្គត់ផ្គង់ថាមពលបន្ថែម ប្រមាណ ២០ ទៅ ៣០ ភាគរយប្រហាក់ប្រហែល ១០០ មេហ្គាវ៉ាត់ ដោយសារតែមានការសង់ផ្ទះថ្មីៗ ហើយនិងការកើនឡើងនូវការប្រើប្រាស់បរិក្ខាគ្រឿងអេឡិចត្រូនិក។ លោកវ៉ិច ទ័រហ្សូណា បានលើកឡើងថា ជិត ១០០ ភាគរយនៃប្រជាពលរដ្ឋរស់នៅក្នុងតំបន់ទីប្រជុំជនក្រុង មានកង្ហារ និងទូរទស្សន៍ប្រើ ហើយប្រមាណ ៦០ ភាគរយមានទូទឹកកក។ លោកវ៉ិច ទ័រហ្សូណាបានបន្ថែមថា ប្រជាពលរដ្ឋជាច្រើននៅតំបន់ជនបទចង់ប្រើប្រាស់គ្រឿងអេឡិចត្រូនិក ប៉ុន្តែក្តីប្រាថ្នារបស់ពួកគេត្រូវបានខកខានដោយសារតែគេខ្វះការផ្គត់ផ្គង់ថាមពលឬក៏ការលក់អគ្គិសនីក្នុងតម្លៃថោក។
បច្ចុប្បន្នតម្លៃលក់ថាមពលនៅក្នុងតំបន់ទីប្រជុំជនក្រុង ១ គីឡូវ៉ាត់ថ្លៃក្រោម ១០០០ រៀល ថោកជាងថាមពលលក់នៅក្នុងតំបន់ជនបទដាច់ស្រយាលដែលមានតម្លៃ ២០០០ ទៅ ៣០០០ រៀលក្នុងមួយគីឡូវ៉ាត់។ លោកសួន ឌី ប្រធានមន្ទីរឧស្សាហកម្មរ៉ែ និង ថាមពលខេត្តកំពង់ចាម បានថ្លែងថាទោះបីថាមពលនៅជនបទត្រូវបានលក់ក្នុងតម្លៃថ្លៃ ប៉ុន្តែនេះមិនមែនជាឧបសគ្គទាំងស្រុងសម្រាប់ការប្រើប្រាស់គ្រឿងអេឡិចត្រូនិកទេ។
លោកសួន ឌី បានឲ្យដឹងថា ប្រជាពលរដ្ឋរបស់យើងពួកគេអាចប្រើអ្វីដែលគេចង់ប្រើបានដូចជា ទូរទស្សន៍ និង ម៉ាញ៉េជាដើម ពីព្រោះពួកគេយល់ថាឧបករណ៍ទាំងនេះមានតម្លៃថោក និងអាចបំពេរអារម្មណ៍បាន។ លោកថ្លែងថា៖«ខ្ញុំគិតថា ប្រជាជននៅជនបទរបស់យើងអាចប្រើគ្រឿងអេឡិចត្រូនិកបានជាមួយនឹងតម្លៃថាមពលដែលលក់ក្នុងពេលសព្វថ្ងៃ ប៉ុន្តែអ្វីដែលនាំឱ្យគេប្រើប្រាស់គ្រឿងអេឡិចត្រូនិកទាំងនេះមិនបានច្រើន ដូចតំបន់ទីប្រជុំជននោះគឺដោយសារតែគេមានតម្រូវការតិចតែប៉ុណ្ណោះ»៕
ចំណាត់ក្រុម ៖ជីវិតនិងសង្គម
ទិញផលិតផលអេឡិចត្រូនិកដោយវិធីបង់រម្លស់ៈ វិធីទាក់ទាញម៉ូយថ្មី
ខែមករា 17, 2011
បញ្ចេញមតិ
ការចូលហាងលក់សម្ភារអេឡិចត្រូនិកនៅប្រទេសលោកខាងលិចជាធម្មតាតែងតែឃើញស្លាក«លក់បង់រម្លស់ដោយគ្មានការប្រាក់»លើការជាវទូរទស្សន៍ កុំព្យូទ័រ និងផលិតផលប្រើប្រាស់ក្នុងផ្ទះទាន់សម័យដទៃទៀត។ ទោះបីការលក់បង់រម្លោះ ដោយគ្មានការប្រាក់ទើបតែត្រូវបាននាំមកអនុវត្តក្នុងប្រទេសកម្ពុជាក្តី ក៏ហាងជាច្រើនចាប់ផ្តើមផ្តល់ទម្រង់លក់បែបនេះដល់អតិថិជនរបស់ពួកគេ ក្នុងបំណងដើម្បីប្រកួតប្រជែង និងពង្រីកការលក់ឲ្យបានច្រើន ថែមទៀតហើយនៅពេលក្រុមហ៊ុន ១ ចាប់ផ្តើមគម្រោងលក់បែបនេះ ក្រុមហ៊ុនផ្សេងទៀតជាទូទៅត្រូវតែធ្វើតាម ទោះបីវាមានហានិភ័យខ្ពស់ក៏ដោយ។
លោក អ៊ាង យ៉ានិត ដែលជាម្ចាស់ហាងលក់គ្រឿងអេឡិចត្រូនិកយកយីហោតាមឈ្មោះខ្លួនឯងដែលមានទីតាំងជិតផ្សារកណ្តាល ខេត្តបាត់ដំបងបានឲ្យដឹងថា៖«ហាងនៅក្បែរខ្ញុំឲ្យអតិថិជនបង់រម្លស់លើផលិតផលដែលពួកគេទិញ ដូច្នេះហេតុអ្វីខ្ញុំមិនអាចធ្វើតាមបាន? បើមិនធ្វើតាមទេ ខ្ញុំនឹងមិនអាចប្រកួតប្រជែងក្នុងទីផ្សារបានទេ»។ លោកបន្តទៀតថា ហាងលក់គ្រឿងអេឡិចត្រូនិក អ៊ាង យ៉ានិត ទើបតែចាប់ផ្តើមលក់បង់រម្លស់ក្នុងឆ្នាំនេះប៉ុណ្ណោះ។
លោកផ្តល់ហេតុផលថា ការផ្តល់ឲ្យអតិថិជននូវជម្រើសបង់រម្លស់នៅលើផលិតផលរបស់គាត់ ដែលរួមមានឆ្នាំងដាំបាយអគ្គិសនី ទូទឹកកក និងម៉ាស៊ីនត្រជាក់គឺគួរតែសាកល្បង ព្រោះតែការទាក់ទាញម៉ូយមកទិញសម្ភារក្នុងហាងរបស់គាត់ឲ្យកាន់តែច្រើនឡើងថែមទៀត។ ជាមួយគ្នានេះ វាក៏បានផ្តល់មកវិញនូវប្រាក់ចំណេញច្រើនជាងមុនផងដែរ ព្រោះសម្ភារដែលដាក់លក់បង់រម្លស់មានតម្លៃ ១០ ភាគរយថ្លៃជាងទំនិញបង់ប្រាក់ផ្តាច់តែម្តង។
លោក អ៊ាង យ៉ានិត ថ្លែងឲ្យដឹងថា ៖ «ម៉ូយភាគច្រើនដែលទិញទំនិញបង់រម្លស់ពីក្នុងហាងរបស់ខ្ញុំគឺជាកសិករ។ សម្ភារពេញនិយមសម្រាប់ពួកគេ រួមមានទូរទស្សន៍ ម៉ាញ៉េ ឧបករណ៍បំពងសំឡេង និងកង្ហារ»។ លោកបានលើកឡើងថា ជម្រើសបង់ថ្លៃរម្លស់ ដោយគិតការប្រាក់ ១០ ភាគរយមានរយៈពេលកំណត់ ៣ ខែ។ វាហាក់ដូចជាការទិញទំនិញដោយមិនមានដាក់របស់បញ្ចាំដើម្បីធានាការសងបំណុលដែរ ព្រោះវាគ្រាន់តែជាកិច្ចសន្យាផ្ទាល់មាត់ និងពឹងផ្អែកលើការទុកចិត្តគ្នាទៅវិញទៅមកតែប៉ុណ្ណោះ។ លោកបន្តថា ដោយសារការប្រយ័ត្នប្រយែងក្នុងការជ្រើសរើសអតិថិជន ម៉ូយតែប្រមាណ ៥ ភាគរយប៉ុណ្ណោះដែលមិនអាចបង់ប្រាក់តាមកាលកំណត់បាន។
ដូចវិស័យធនាគារដែរ ប្រទេសកម្ពុជាយើងមិនមានប្រព័ន្ធត្រួតពិនិត្យភាពជឿជាក់កណ្តាលទេ មានន័យថាអ្នកលក់មានជម្រើសតិចតួចណាស់ដើម្បីពិនិត្យមើលពីភាពជឿទុកចិត្តបានរបស់អតិថិជន ក្រៅតែពីអ្នកដែលពួកគេបានស្គាល់។ ជាលទ្ធផល ការលក់បង់រម្លស់ដោយមិនគិតការប្រាក់ស្ថិតនៅតែជាចម្ងល់នាពេលបច្ចុប្បន្ននេះ។
អ្នកស្រី សន គីមឡុង តំណាងផ្នែកលក់បង់ថ្លៃរម្លស់របស់ក្រុមហ៊ុន K-four ក្នុងរាជធានីភ្នំពេញដែលជាហាងលក់គ្រឿងអេឡិចត្រូនិកធំមួយក្នុងប្រទេស បានឲ្យដឹងថា សម្រាប់អតិថិជន ជម្រើសបង់រម្លស់បានជួយបង្កើនឱកាសសម្រាប់អ្នកដែលមានជីវភាពក្រីក្ររហូតដល់ម៉ូយមានជីវភាពមធ្យមឲ្យទិញឧបករណ៍អេឡិចត្រូនិកដែលជាទូទៅមានតម្លៃថ្លៃជាងកម្រិតចំណាយរបស់ពួកគេ។ កម្រិតនៃការចំណាយក្នុងប្រទេសកម្ពុជាបានធ្លាក់ចុះ ជាពិសេសក្រោយមានវិបត្តិសេដ្ឋកិច្ចជាសកល។
អ្នកស្រី សន គឹមឡុង មានប្រសាសន៍ថា៖«ជម្រើសនេះល្អណាស់ សម្រាប់ការទាក់ម៉ូយថ្មីបន្ថែមទៀតហើយយើងបានមានអតិថិជនរាប់រយនាក់មកទល់ពេលនេះ»។
យោងតាមលក្ខន្តិកៈសម្រាប់អតិថិជនបែបនេះចេញដោយក្រុមហ៊ុន អតិថិជនរបស់ K-four ដែលអាចប្រើសេវាបង់រម្លស់បានត្រូវតែមានអាសយដ្ឋាននៅរាជធានី ហើយពួកគេតម្រូវឲ្យបង្ហាញអត្តសញ្ញាណប័ណ្ណ ឬសៀវភៅគ្រួសារ និងតម្រូវឲ្យបង់ប្រាក់ជាមុន។ អ្នកស្រី សន គឹមឡុង បានឲ្យដឹងថា ក្រុមហ៊ុន K-four មានគម្រោងលក់បែបនេះចំនួន ២ គឺគម្រោងបង់រម្លស់រយៈពេល ៣ ខែដោយអត្រាការប្រាក់ ១០ ភាគរយ និងគម្រោងរយៈពេល ៦ ខែដោយអត្រាការប្រាក់ ២០ ភាគរយលើតម្លៃដើម។
អ្នកស្រីថ្លែងថា៖«សម្រាប់អ្នកមាន គម្រោងលក់បែបនេះមិនគួរឲ្យទាក់ទាញឡើយ ព្រោះពួកគេនិយមទិញទំនិញដោយមានប្រាក់ក្នុងដៃ ប៉ុន្តែសម្រាប់អតិថិជនដែលមានចំណូលតិចវិញ វាពេញនិយមណាស់នាពេលបច្ចុប្បន្ននេះ ព្រោះអត្រាការប្រាក់ដែលយើងដាក់មានកម្រិតសមរម្យ»។
អតិថិជនមួយរូបដែលបានទិញទូទឹកកកពីហាង K-four ដោយកម្មវិធីបង់រម្លស់នេះបានឲ្យដឹងថាប្រាក់ចំណូលមានកម្រិតរបស់គ្រួសារលោកគឺជាមូលហេតុចំបងនាំឲ្យលោកសម្រេចទិញទំនិញដោយបង់បណ្តាក់បែបនេះ។ លោក សេង សុខជា ថ្លែងឲ្យដឹងថា៖«យើងមិនមានលទ្ធភាពបង់ប្រាក់ទាំងអស់ក្នុងពេលតែម្តងបានទេ ហេតុនេះហើយ យើងជ្រើសរើសវិធីបង់ប្រាក់តាមដំណាក់កាលក្នុងរយៈពេល ៦ ខែ»។
លោក ថៃ ឃាង ម្ចាស់ហាងលក់គ្រឿងអេឡិចត្រូនិកតូច ១ នៅក្បែរផ្សារកណ្តាល រាជធានីភ្នំពេញបានថ្លែងថា លោកមិនអាចផ្តល់ជម្រើសបង់រម្លស់បែបនេះដល់អតិថិជនរបស់លោកបានទេ។ លោកមានប្រសាសន៍ថា៖«មានតែហាងធំៗទេដែលអាចផ្តល់នូវសេវាកម្មបែបនេះបាន ព្រោះពួកគេមានទុនដែលចាំបាច់។ សម្រាប់ហាងតូចតាចដូចខ្ញុំ យើងជាធម្មតាមិនមានថវិកាដើម្បីប្រើក្នុងសេវាកម្មបែបនេះទេ ហើយវាក៏មានគ្រោះថ្នាក់នៃការខាតបង់ខ្ពស់ផងដែរដោយសារតែវាមិនតម្រូវឲ្យមានរបស់របរបញ្ចាំ»។
ដោយសារប្រទេសកម្ពុជាកំពុងវិវឌ្ឍផ្នែកទំនុកចិត្ត និងការកំណត់មុននូវសុវត្ថិភាព ការទិញដោយការបង់ប្រាក់រម្លស់ គឺនៅតែជាគំនិតថ្មី ១ ក្នុងប្រទេសនេះ។ ប៉ុន្តែយោងតាមជោគជ័យនៅក្នុងបណ្តាប្រទេសជាច្រើន ជម្រើសទិញរបៀបនេះហាក់មានការរីកលូតលាស់ឆាប់រហ័ស ដោយមិនគិតពីគ្រោះថ្នាក់ដែលអាចមានទាំងចំពោះអតិថិជន និងអ្នកលក់៕
ចំណាត់ក្រុម ៖ពត៌មានបច្ចេកវិទ្យា
តូយ៉ូតាគ្រោងនឹងចេញរថយន្ត Scion ដើម្បីបង្កើនការលក់
ខែមករា 17, 2011
បញ្ចេញមតិ
អាមេរិកៈ រថយន្តម៉ាក Scion របស់ក្រុមហ៊ុនតូយ៉ូតា ដែលបានចាប់ផ្តើមក្នុងឆ្នាំ២០០៣ ដើម្បីទាក់ទាញអតិថិជនអាមេរិកគ្រប់វ័យ ដោយផលិតម៉ូដែលទំនើបដើរដោយថាមពលអគិ្គសនីបន្ថែមទៀត ដើម្បីបង្កើនការលក់។
លោក Jack Hollis អនុប្រធានរបស់ក្រុមហ៊ុនតូយ៉ូតា ប្រចាំ នៅសហរដ្ឋអាមេរិកដែលគ្រប់គ្រងរថយន្តម៉ាក Scion បានថ្លែងក្នុងបទសម្ភាសមួយកាលពីម្សិលមិញនៅពិធីតាំងពិព័រណ៍ រថយន្តអន្តរជាតិអាមេរិកខាងជើងក្នុងទីក្រុងDetroit ថាការណែនាំរថយន្តម៉ាក Scion នឹងចេញលក់នាពេលឆាប់ៗតម្លៃ ២ម៉ឺនដុល្លារ។
លោកអ្នកនឹងឃើញមានម៉ូដែលរថយន្ត Scion ច្រើនជាងនេះ រាប់ចាប់ពីតម្លៃថោក ដល់តម្លៃថ្លៃ ហើយម៉ូដែលទាំងនោះជាផ្នែកមួយនៃការរំពឹងទុករបស់យើង»។
ប្រធានផ្នែកលក់ប្រចាំអាមេរិក លោក Jim Lentz បានប្រាប់អ្នកយកព័ត៌មានក្នុងទីក្រុង Detroit កាលពីថ្ងៃអង្គារថា ក្រុមហ៊ុនតូយ៉ូតា ក៏ទំនងជានឹងផលិតរថយន្តម៉ាក Scion ប្រើប្រាស់ថាមពលអគ្គិសនី ដែលនឹងដាក់លក់នៅឆ្នាំ២០១២ ផងដែរ។ លោក បានបន្ថែមថា រថយន្តប្រើប្រាស់អគ្គិសនីនេះ នឹងមានឈ្មោះថា Scion iQ minicar។
ការលក់រថយន្ត Scion បានកើនឡើង បន្ទាប់ពីបានបំពាក់និមិត្តសញ្ញា Scion នៅទូទាំងអាមេរិក ដោយធ្វើឲ្យចំនួនលក់ កើនដល់១៧៣ ០៣៤គ្រឿងក្នុងឆ្នាំ២០០៦។
ដោយឡែក ការចែកចាយរថយន្ត xB រថយន្ត xD និងរថយន្តស្ព័រទ្វារពីរ tC បានធ្លាក់ចុះ ចាប់តាំងពីពេលនោះមក ដោយលក់បានចំនួនសរុបត្រឹមតែ ៤៥ ៦៧៨គ្រឿង កាលពីឆ្នាំមុន។
ការធ្លាក់ចុះ មួយផ្នែកបណ្តាលមកពីម៉ូដែលរថយន្តទាំងនេះ កាន់តែចំណាស់ និងការកើនឡើងអត្រាគ្មានការងារធ្វើក្នុងចំណោមយុវជនអាមេរិក ដែលជាអតិថិជនស្នូលរបស់ Scion៕
ចំណាត់ក្រុម ៖ព្រឹត្តិការណ៏អន្តរជាតិ
ចិននឹងសាងសង់ព្រលានយន្តហោះថ្មី
ខែមករា 17, 2011
បញ្ចេញមតិ
ប៉េកាំងៈ តាមរបាយការណ៍ដែល AFP ទទួលបានកាលពីថ្ងៃពុធ រដ្ឋាភិបាលប៉េកាំង មានផែនការសាងសង់ព្រលានយន្តហោះធំទីពីរក្នុងរយៈពេល៥ឆ្នាំ ខាងមុខ ដើម្បីតាមឲ្យទាន់កំណើនការធ្វើដំណើរផ្លូវអាកាសក្នុងប្រទេសមាន សេដ្ឋកិច្ចដ៏លឿននេះ។
ប្រព័ន្ធផ្សព្វផ្សាយរដ្ឋ បានឲ្យដឹងថាព្រលានយន្តហោះនេះត្រូវបានរំពឹងថានឹងមានសមត្ថភាព ទទួលអ្នកដំណើរបាន៦០លាននាក់ក្នុងមួយឆ្នាំ ដោយជួយបន្ធូរបន្ថយសម្ពាធដល់ព្រលានយន្តហោះអន្តរជាតិប៉េកាំង ដែលមានស្រាប់។ ព្រលានយន្តហោះអន្តរជាតិប៉េកាំង ជាព្រលានដ៏មមាញឹកបំផុតទីពីររបស់ពិភពលោក ដោយមានអ្នកដំណើរឆ្លងកាត់ ៧៣,៩លាននាក់កាលពីឆ្នាំមុន។
គណៈកម្មការអភិវឌ្ឍន៍ និងកំណែទម្រង់ក្រុងប៉េកាំង បានឲ្យដឹងក្នុងសេចក្តីថ្លែងកាណ៍នេះថា រដ្ឋាភិបាលកណ្តាល មិនទាន់អនុម័តគម្រោងនេះនៅឡើយទេ។
ប៉ុន្តែ លោក Li Jiaxiang ប្រធានរដ្ឋបាលអាកាសចរណ៍ស៊ីវិលចិន (CAAC) បញ្ជាក់ពីតម្រូវការចាំបាច់ ដើម្បីកាត់បន្ថយសម្ពាធលើព្រលានយន្តហោះដែលមានស្រាប់។
ទីក្រុងប៉េកាំង មានព្រលានយន្តហោះពាណិជ្ជកម្មចំនួនពីររួចជាស្រេចហើយ។ ព្រលានអន្តរជាតិទីមួយ ស្ថិតនៅភាគឦសាន និងព្រលានក្នុងស្រុកតូចជាងនេះមួយទៀតមានទីតាំងស្ថិតនៅភាគខាង ត្បូងទីក្រុង។ របាយការណ៍ បានឲ្យដឹងបន្តថា ការសាងសង់ព្រលានថ្មី ទំនងជាងនឹងចាប់ផ្តើមនៅឆ្នាំនេះ ហើយលោក Li ប៉ាន់ប្រមាណថាយ៉ាងហោចណាស់នឹងចំណាយទឹកប្រាក់វិនិយោគអស់ ១៥ ពាន់លានដុល្លារ។
របាយការណ៍ បានឲ្យដឹងបន្ថែមថា CAAC មានផែនការវិនិយោគទឹកប្រាក់ ៥៥ ពាន់លានយន់ក្នុងការសាងសង់ព្រលានយន្តហោះ ១១ មានទីតាំងនៅជុំវិញប្រទេសក្នុងឆ្នាំនេះ រួមទាំងព្រលាន ដែលគ្រោងនឹងសាងសង់ក្នុងទីក្រុងប៉េកាំង និងពង្រីកព្រលានដែលមានស្រាប់ ដើម្បីបំពេញទៅនឹងកំណើនតម្រូវការធ្វើដំណើរតាមផ្លូវអាកាស៕
ចំណាត់ក្រុម ៖ព្រឹត្តិការណ៏អន្តរជាតិ
ផ្សារទំនើបដំបូងមួយនៅខេត្តព្រះសីហនុនឹងបើកខែ២
ខែមករា 17, 2011
បញ្ចេញមតិ
ខេត្តព្រះសីហនុៈ ផ្សារទំនើបដំបូងមួយនៅខេត្តព្រះសីហនុ គ្រោងនឹងបើកដំណើរការនៅដើមខែក្រោយ។ នេះបើតាមលោក ទួស សាភឿន ប្រធានគ្រប់គ្រងគម្រោងសាងសង់ផ្សារនេះ។
លោក ទួស សាភឿន បានឲ្យដឹងថា ផ្សារទំនើបមិត្តភាព ដែលមានកម្ពស់ពីរជាន់ ដែលចំណាយទឹកប្រាក់អស់ ១០លានដុល្លារ សាងសង់ជិតរួចរាល់ហើយ ដោយក្រុមហ៊ុនអភិវឌ្ឍន៍សាងសង់ផ្សារនេះ មានបំណងបើកតូបប្រហែលជា ៨០០ ដល់អ្នកលក់ដូរនៅក្នុងផ្សារនេះ។
លោកមានប្រសាសន៍ថា៖ «យើងបានបើកផ្សារទំនើបដំបូងនៅខេត្តព្រះសីហនុហើយ យើងនឹងទាក់ទងអតិថិជន មកលក់នៅក្នុងផ្សារនេះ ដោយសារវាស្ថិតនៅក្នុងទីតាំងល្អ»។
ផ្សារទំនើបនេះ ជាកម្មសិទិ្ធរបស់លោក ខូវ សម្បត្តិ អគ្គនាយកក្រុមហ៊ុនថៃ ប៊ុនរ៉ុង និងជាកូនប្រុសលោក ថេង ប៊ុនម៉ា។ ផ្សារនេះ ជាផ្នែកមួយ នៅក្នុងគម្រោងអភិវឌ្ឍន៍សាងសង់បុរីទីក្រុងគុជអាស៊ីដែលលាតសន្ធឹង លើផ្ទៃដី ៦២ហិកតា នៅក្នុងខណ្ឌមិត្តភាពស្ថិតនៅខាងមុខឆ្នេរសុខា ហើយទីតាំងនេះ អាចចតយានយន្តបានដល់ទៅ១ ៥០០គ្រឿង។
លោក ទួស សាភឿន បានឲ្យដឹងថា គ្រាន់តែដំបូលផ្សារនេះ ចំណាយទឹកប្រាក់អស់ ២លានដុល្លារអាមេរិកទៅហើយ។លោកបានលើកឡើងថា៖ «យើងសាងសង់ជិតរួចរាល់ហើយ យើងនឹងបើកទ្វារបម្រើអតិថិជន នៅខែកុម្ភៈ»។
ទោះបីជានៅសល់ពេលតែ១ខែទៀតប៉ុណ្ណោះ ដែលផ្សារនេះ នឹងបើកដំណើរការ ប៉ុន្តែលោក ទួស សាភឿន បានអះអាងថា ថ្លៃជួលទាំ ៨០០តូប នៅក្នុងផ្សារនេះ មិនទាន់បានកំណត់នៅឡើយទេ។ តម្លៃជួលតូបទាំងនោះ នឹងប្រកាសឲ្យដឹងនៅពេលផ្សារបើកតែម្តង។
លោក ទិត្យ ចន្ថា អគ្គនាយកនៅក្រសួងទេសចរណ៍ បានឲ្យដឹងថា លោកបានស្វាគមន៍ចំពោះគម្រោងនេះ។ លោកបានបន្ថែមថា ផ្សារនេះនឹងទាក់ទាញភ្ញៀវទេសចរជាតិ និងអន្តរជាតិ ឲ្យមកកាន់តំបន់ឆ្នេរ។
លោកមានប្រសាសន៍ថា៖ «ផ្សារនេះ នឹងដើរតួនាទីយ៉ាងសំខាន់ក្នុងការអភិវឌ្ឍវិស័យទេសចរណ៍ និងជួយលើកកម្ពស់វិស័យនេះ។ យើងពិតជាគាំទ្រគម្រោងនេះយ៉ាងខ្លាំង ហើយសង្ឃឹមថា វានឹងអាចទាក់ទាញភ្ញៀវទេសចរឲ្យមកកាន់តំបន់នេះ កាន់តែច្រើន នាពេលអនាគត»។
លោក ឡៅ ទិព្វសីហា ប្រធាននាយកដ្ឋានសំណង់ នៅក្រសួងរៀបចំដែនដីនគរូបនីយកម្ម និងសំណង់ បានឲ្យដឹងកាលពីម្សិលមិញថា គម្រោងនេះ បានទទួលអាជ្ញាប័ណ្ណលើកដំបូងពីឆ្នាំ២០០៩។
លោកបានបញ្ជាក់ថា វិបត្តិសេដ្ឋកិច្ចពិភពលោក បានប៉ះពាល់យ៉ាងខ្លាំងដល់វិស័យសំណង់នៅកម្ពុជា ប៉ុន្តែក្រុមហ៊ុនអភិវឌ្ឍន៍ការសាងសង់មួយចំនួន នៅតែបន្តគម្រោងរបស់ខ្លួនដដែល។
លោកបន្តថា៖ «យើងមានមោទនភាពនៅពេលដែលផ្សារទំនើបថ្មី បើកនៅខេត្តព្រះសីហនុ»។
លោកបានបន្ថែមថា តំបន់នេះនឹងមានឱកាសរីកចម្រើនទៅទៀត។
មន្ត្រីទេសចរណ៍មូលដ្ឋាន បានឲ្យដឹងថា ទីក្រុងឆ្នេរសមុទ្រកម្ពុជា កំពុងក្លាយទៅជាតំបន់ទាក់ទាញភ្ញៀវទេសចរកាន់តែច្រើនឡើងៗ។
លោក សម ចន្ថា ប្រធានមន្ទីរទេសចរណ៍ខេត្តព្រះសីហនុ បានមានប្រសាសន៍ថា៖ «យើងបានកត់សម្គាល់ឃើញពីកំណើនភ្ញៀវទេសចរដែលបានមកទស្សនាទីនេះ ជារៀងរាល់ឆ្នាំ ដោយសារទីនេះ មានសណ្ឋាគារ និងផ្ទះសំណាក់ល្អៗជាច្រើន ហើយមានសក្តានុពលបន្ថែមទៀត»។
លោកបានឲ្យដឹងថា បច្ចុប្បន្ន ខេត្តព្រះសីហនុ មានសណ្ឋាគារប្រហែល ៤៧ និងផ្ទះសំណាក់ប្រហែល ១១៥ កំពុងបើកដំណើរការ ហើយសណ្ឋាគារបីបន្ថែមទៀត កំពុងសាងសង់។
ក្រុមហ៊ុន ថៃ ប៊ុនរ៉ុង កំពុងសាងសង់សណ្ឋាគារមិត្តភាពកម្ពស់១៧ជាន់ នៅខេត្តព្រះសីហនុ។ «សណ្ឋាគារប្រណីតនេះ» សាងសង់អស់ទឹកប្រាក់ ៤០លានដុល្លារ ដែលបានចាប់ផ្តើមកាលពីថ្ងៃទី១ មករា ឆ្នាំ ២០១១។
កាលពីមុន ក្រុមហ៊ុនអភិវឌ្ឍន៍មួយចំនួន នៅខេត្តព្រះសីហនុ បានបង្ហាញក្តីកង្វល់ចំពោះកង្វះការហោះហើរទៅព្រលានយន្តហោះ ខេត្តព្រះសីហនុ៕
ចំណាត់ក្រុម ៖ព្រឹត្តិការណ៏ជាតិ
មាត់ដាច 