ភ្នំពេញៈ រដ្ឋមន្រី្ដ ក្រសួងពាណិជ្ជកម្ម កម្ពុជា លោកទេសរដ្ឋមន្ដ្រី ស៊ុន ចាន់ថុល បានថ្លែង នៅថ្ងៃទី២១ ខែមករា ឆ្នាំ២០១៤ថា ប្រទេសកម្ពុជា នឹងអាចសម្រេចបាន គោលដៅ នាំអង្ករចេញ ១លានតោន នៅឆ្នាំ២០១៥ ខាងមុខ ។

ការសម្ដែងនូវក្ដី សុទិដ្ឋិនិយមនេះ នៅគ្រាដែលលោករដ្ឋមន្ដី្រ បានឃើញតួរលេខ នៃការនាំចេញអង្ករ របស់កម្ពុជា មានកំណើនគួឲ្យ កត់សម្គាល់ កាលពីឆ្នាំ២០១៣ កន្លងទៅ និងម្យ៉ាងទៀត ដោយសាតែកេរិ៍្ដអង្ករ របស់កម្ពុជា ត្រូវបានពិភពលោក ទទួលស្គាល់ថា មានឱជារសឆ្ងាញ់ដាច់គេ ។

ថ្លែងនៅក្នុងពិធីចុះអនុសារណៈ យោគយល់គ្នារវាង ក្រុមហ៊ុនកូរ៉េ ដែលមានឈ្មោះថា Hanwha និងក្រុមហ៊ុន Amru rice លោកទេសរដ្ឋមន្ដ្រី ស៊ុន ចាន់ថុល បានបញ្ជាក់ថា «ឥឡូវនេះយើងនាំអង្ករ ចេញបានជាង ៤រយពាន់តោន ហើយយើងនៅសល់ ពេលឆ្នាំ២០១៤ និងឆ្នាំ២០១៥ទៀត យើងសង្ឃឹមថា អាចនឹងឈានដល់ ១លានតោន»។

លោក ស៊ុន ចាន់ថុល ក៏បានបញ្ជាក់ទៀតថា អង្កររបស់កម្ពុជា ត្រូវបានអន្ដរជាតិទទួលស្គាល់ថា មានរសជាតិឆ្ងាញលើសគេ ក៏ព្រោះតែអង្ករក្រអូប របស់កម្ពុជា ទើបតែទទួលបាន ចំណាត់ថ្នាក់លេខ១ ពីរឆ្នាំជាប់គ្នាក្នុងពិព័ណ៌អង្ករ ពិភពលោក ដែលធ្វើឡើង កាលពីខែវិច្ឆិកា ឆ្នាំ២០១៣ នៅទីក្រុងហុងកុង និងកាលពីឆ្នាំ ២០១២ នៅកោះប៉ាលី ប្រទេសឥណ្ឌូនេស៊ី។

លោក ស៊ុន ចាន់ថុល បន្ថែមទៀតថា ក្នុងមួយឆ្នាំៗ ប្រទេសកម្ពុជាអាចផលិតអង្ករ បានរហូតដល់ ៩លានតោន ក្នុងនោះ ៤លានតោន សម្រាប់ផ្គត់ផ្គងក្នុងស្រុក និងនៅសល់ ៥លានតោនទៀត សម្រាប់នាំចេញ តែដោយសាកម្ពុជា មិនទាន់មានលទ្ធភាពនាំចេញ បានទាំងស្រុង ទើបប្រជាពលរដ្ឋលក់ស្រូវទៅវិញ។
យោងតាមតួលេខពី លេខាធិការដ្ឋានច្រកចេញ ចូលតែមួយ សម្រាប់បំពេញបែបបទនៃការនាំចេញអង្ករ បានបញ្ជាក់ថា រយៈពេលពេញ១ឆ្នាំ នៃឆ្នាំ២០១៣ ប្រទេសកម្ពុជា បាននាំចេញអង្ករ ចំនួន ៣៧៨.៨៥៦តោន ពោលគឺកើនឡើង ៨៤ភាគរយ បើប្រៀបធៀប ទៅនឹងឆ្នាំ២០១២ ដែលមានចំនួនត្រឹមតែ ២០៥.៧១៧តោន ។

សូមបញ្ជាក់ថា ប្រទេសកម្ពុជា បាននាំចេញអង្ករទៅកាន់ ប្រទេសចំនួន ៦៦ជុំវិញពិភពលោក ខណៈដែលក្រុមហ៊ុន នាំចេញអង្ករ ដែលកំពុងប្រតិបត្ដិការ រកស៊ីនៅកម្ពុជា មានសរុបចំនួន ៨៤ក្រុមហ៊ុន ។ រាជរដ្ឋាភិបាលកម្ពុជា មានផែនការនាំចេញអង្ករ ឲ្យបាន ១លានតោនក្នុងឆ្នាំ២០១៥ ៕

ភ្នំពេញ៖ សហព័ន្ធអ្នកនាំចេញអង្ករកម្ពុជា នៅព្រឹកថ្ងៃទី២២ ខែមករា ឆ្នាំ២០១៤ នេះបានរៀបចំមហាសន្និបាត បូកសរុបការងារ ប្រចាំឆ្នាំរបស់ខ្លួន នៅសណ្ឋាគារសាន់វេ ក្រោមអធិបតីភាពលោក ទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងពាណិជ្ជកម្ម។

សហព័ន្ធអ្នកនាំចេញអង្ករកម្ពុជា បានបង្កើតឡើងចំនួន២ឆ្នាំមកហើយ ពោលគឺចាប់ពីឆ្នាំ២០១២។ សហព័ន្ធអ្នកនាំចេញអង្ករ កម្ពុជាបង្កើតឡើងក្រោមការ ជ្រោមជ្រែងរបស់អតីតរដ្ឋមន្ត្រីក្រសួងពាណិជ្ជកម្ម លោក ចម ប្រសិទ្ធ ដោយបោះឆ្នោត រើសប្រធានកាលពីថ្ងៃទី២១ ខែមិថុនា ឆ្នាំ២០១២ ដោយលោកឧកញ៉ា គឹម សាវុធ ត្រូវបានសមាជិកជាច្រើន លើសលុបផ្តល់សេចក្តីទុកចិត្ត បោះឆ្នោតឲ្យជាប់ជាប្រធាន សហព័ន្ធអ្នកនាំចេញអង្ករកម្ពុជា។

ការបង្កើតសហព័ន្ធអ្នកនាំចេញអង្ករកម្ពុជា ដើម្បីគៀងគរភាគីពាក់ព័ន្ធ ដែលរកស៊ីវិស័យស្រូវ-អង្ករ ឲ្យរួមគ្នាតែមួយ ដើម្បីសហការគ្នាក្នុង ការនាំចេញអង្ករ សម្រេចគោលនយោបាយនាំចេញអង្ករ របស់រាជរដ្ឋាភិបាលកម្ពុជា ១លានតោននៅឆ្នាំ២០១៥៕

ភ្នំពេញ៖ បន្ទាប់ពីបានធ្វើការចរចាររយៈពេលពីរថ្ងៃគឺពីថ្ងៃទី ៣-៤ខែធ្នូ ឆ្នាំ ២០១៣ នៅទីស្តីការក្រុមប្រឹក្សាអភិវឌ្ឍន៍កម្ពុជា (CDC) រវាងរាជរាជរដ្ឋាភិបាលកម្ពុជា និងរដ្ឋាភិបាលសាធារណៈសហព័ន្ធរដ្ឋអាល្លឺម៉ង់ ស្តីពីកិច្ចសហប្រតិបត្តិការអភិវឌ្ឍន៍ រដ្ឋាភិបាលអាល្លឺម៉ង់បានសន្យាផ្តល់ហិរញ្ញប្បទានចំនួន ៤៧,០៥ លានអឺរ៉ូ (៦៤លានដុល្លារអាមេរិក) ជាហិរញ្ញប្បទានថ្មីដល់ កម្ពុជាសម្រាប់អភិវឌ្ឍន៍គម្រោងអទិភាពនានានៅឆ្នាំ២០១៣ និង២០១៤។

ហិរញ្ញប្បទានទាំងនេះគ្រោងនឹងប្រើប្រាស់សម្រាប់គាំទ្រវិស័យសុខាភិបាលចំនួន ២០,១ លានអឺរ៉ូ វិស័យអភិវឌ្ឍន៍ជនបទចំនួន ១៩,៦លានអឺរ៉ូ ការអភិវឌ្ឍន៍អន្តរវិស័យ ដែលរួមមានការកំណែទម្រង់អភិបាលកិច្ចចំនួន ៤,០៥ លានអឺរ៉ូ និងសម្រាប់ការសិក្សា និងស្រាវជ្រាវចំនួន ៣,៥លានអឺរ៉ូ។

គម្រោងផ្តល់ហិរញ្ញប្បទាននេះ ត្រូវបានធ្វើឡើងដោយមានការចុះហត្ថលេខារវាង លោក ឈៀង យ៉ាណារ៉ា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការគណៈកម្មាធិការនីតិសម្បទាន និងអភិវឌ្ឍន៍នៃក្រុមប្រឹក្សាអភិវឌ្ឍន៍កម្ពុជា ដែលតំណាងឲ្យរាជរដ្ឋាភិបាលកម្ពុជា និង ខាងភាគីអាល្លឺម៉ង់តំណាងដោយលោកបណ្ឌិត Andreas Pfeil ជានាយកប្រចាំតំបន់អាស៊ីកណ្តាល អាស៊ីខាងកើត ប្រទេសកម្ពុជា និងឡាវ នៃក្រសួងសហប្រតិបត្តិការសេដ្ឋកិច្ច និងអភិវឌ្ឍន៍អាល្លឺម៉ង់ (BMZ) ព្រមទាំងមានការចូលរួមជាកិត្តិយសពីលោក Joachim Baron von Marschall ឯកអគ្គរដ្ឋទូតអាល្លឺម៉ង់ប្រចាំនៅកម្ពុជាផងដែរ។

ថ្លែងនៅក្នុងពិធីចុះហត្ថលេខាកាលពីថ្ងៃពុធទី ៤ខែធ្នូឆ្នាំ ២០១៣ លោក ឈៀង យ៉ាណារ៉ា បានមានប្រសាសន៍ថា «រាជរដ្ឋាភិបាលកម្ពុជាប្តេជ្ញាខ្ពស់បន្តកែទម្រង់ស៊ីជម្រៅ។ អភិបាលកិច្ចល្អពិសេសការប្រយុទ្ធប្រឆាំងនឹង អំពើពុករលួយ គឺជាស្នូលនៃកិច្ចប្រឹងប្រែងរបស់រាជរដ្ឋភិបាលដូចបានគូសបញ្ជាក់នៅក្នុងយុទ្ធសាស្ត្រចតុកោណ ដំណាក់កាលទី ៣។ រាជរដ្ឋាភិបាលសូមថ្លែងអំណរគុណចំពោះប្រជាជន និងរដ្ឋាភិបាលអាល្លឺម៉ង់ ចំពោះការ សន្យាផ្តល់ហិរញ្ញប្បទាននាពេលនេះ»។

លោកបណ្ឌិត Andreas Pfeil បានមានប្រសាសន៍ថា «ការសន្យាផ្តល់ហិរញ្ញប្បទាននាពេលនេះ ស្តែងចេញពីឆន្ទៈរបស់រដ្ឋាភិបាលអាល្លឺម៉ង់ក្នុងការបន្តគាំទ្រកិច្ចប្រឹងប្រែងរបស់រាជរដ្ឋាភិបាលកម្ពុជាក្នុងការប្រយុទ្ធប្រឆាំងនឹងភាពក្រីក្រ។ កិច្ចសហប្រតិបត្តិការកម្ពុជា-អាល្លឺម៉ង់មានគោលដៅពង្រឹងការលើកកម្ពស់សិទ្ធិមនុស្ស និងចូលរួមចំណែកកែលម្អរជីវភាពរស់នៅរបស់ប្រជាជនកម្ពុជា»។

សម្រាប់ឆ្នាំ ២០១៣-២០១៤ ការផ្តល់ហិរញ្ញប្បទានមានការកើនឡើងច្រើន បើប្រៀបធៀបជាមួយបណ្តាឆ្នាំមុនៗ ដែលមានទំហំប្រមាណ ៣០លានអឺរ៉ូ ក្នុងមួយឆ្នាំៗ។ ហិរញ្ញប្បទានសហប្រតិបត្តិការដែលផ្តល់ដោយរដ្ឋាភិបាលអាល្លឺម៉ង់ ចាប់ផ្តើមតំាងពីទំនាក់ទំនងកម្ពុជា-អាល្លឺម៉ង់ ក្នុងឆ្នាំ ១៩៦០ ដែលមានទំហំទឹកប្រាក់ប្រមាណ ៣០៣ លានអឺរ៉ូ៕

ភ្នំពេញ៖ បន្ទាប់ពីទទួលបានជ័យជំនះនៅហុងកុងមានឈ្មោះជាអង្ករឆ្ងាញ់ហើយនោះ អង្ករផ្កា ម្លិះកម្ពុជាត្រូវបានឈ្មួញទិញអង្កររបស់ហុងកុងចាប់អារម្មណ៍នឹងមានបំណងចងយកអង្ករផ្កា ម្លិះកម្ពុជាជំនួសអង្ករក្រអូបថៃចរាចរណ៍នៅលើទីផ្សាររបស់ខ្លួន។

អំនះអំណាងនេះធ្វើឡើងនៅទីស្នាក់ការធនាគារអភិវឌ្ឍន៍ជនបទនៅថ្ងៃទី៤ខែធ្នូឆ្នាំ ២០១៣ តាមរយៈជំនួបរវាងគណៈប្រតិភូហុងកុងជាមួយសមាគមន៍អ្នកនាំចេញអង្កររបស់កម្ពុជា។

លោក ហ៊ុន ឡាក់ អគ្គលេខាធិការសម្ព័ន្ធអ្នកផលិតស្រូវ និងនាំអង្ករកម្ពុជាបានលើកឡើងថា នេះជាមោទនភាពមួយរបស់កម្ពុជាបន្ទាប់ពីជាប់លេខ១ពីរលើកផ្ទួនគ្នាៗធ្វើឲ្យអង្ករផ្កាម្លិះកម្ពុជាមានឈ្មោះល្បីនិងមានការចាប់អារម្មណ៍ពីក្រុមហ៊ុនក្នុងទីក្រុងហុងកុង។

លោកបន្តថា «តាមរយៈជំនួបពិភាក្សាជាមួយក្រុមហ៊ុនទិញអង្ករបស់ហុងកុងគេបានសន្យាថា នឹងនាំយកអង្ករកម្ពុជាចូលក្នុងទីផ្សារហុងកុងដើម្បីចែកចាយក្នុងប្រទេសនិងចែកចាយបន្តទៅកាន់ទីផ្សារអន្តរជាតិហើយយើងនឹងធ្វើការទំនាក់ទំនងជាមួយសម្ព័ន្ធស្រូវនិងអង្ករកម្ពុជាដើម្បីសិក្សានិងសហការក្នុងការនាំអង្ករចេញទៅហុងកុង»។

លោកឲ្យដឹងទៀតថា ក្រុមអ្នករកស៊ី វិស័យស្រូវអង្ករហុងកុងនឹងទស្សនកិច្ចមើលរោងម៉ាស៊ីនកែច្នៃស្រូវអង្ករចំនួន៧ក្នុងប្រទេស កម្ពុជា។ អង្ករក្រអូបកម្ពុជាក្នុងការប្រកួតប្រជែងគុណភាពអង្ករ និងរសជាតិឆ្ងាញ់ជាងគេលើពិភពលោក នៅទីក្រុងហុងកុង ប្រទេសចិន កាលពីថ្ងៃទី១៩ ខែវិច្ឆិកា កន្លងទៅនេះ បានទទួលជ័យលាភីលេខ១ ហើយនេះជាជ័យលាភីលើកទី២ សម្រាប់អង្ករកម្ពុជាផងដែរ។ ដោយជ័យលាភីលេខ១ នៅលើកទី១ បានទទួលនៅឆ្នាំ២០១២ ក្នុងការប្រកួត ប្រជែង នៅកោះបាលី ប្រទេសឥណ្ឌូនេស៊ី។

ទន្ទឹមគ្នារដ្ឋមន្ត្រីក្រសួងពាណិជ្ជកម្មលោកស៊ុន ចាន់ថុល កាលពីពេលថ្មីៗនេះ បានក្រើនរំលឹក ឲ្យសមាគម ម៉ាស៊ីន កិនស្រូវ និងអ្នករកស៊ីលើក វិស័យស្រូវអង្ករ គិតពិចារណា ចុះបញ្ជីការពារម៉ាក ប្រភេទអង្ករផ្កាម្លិះ ដែលទើបទទួល បាន ពានរង្វាន់លេខ១ លើពិភពលោក នាទីក្រុងហុងកុង កាលពីពេលថ្មីៗ។

លោកស៊ុន ចាន់ថុល ក៏បានជំរុញ ឲ្យទប់ស្កាត់ ការលាយ បន្លំប្រភេទអង្ករ និងបន្លំប្រភពអង្ករនាំចេញ ដោយប្រើវិញ្ញាបនប័ត្រប្រភពដើមពីកម្ពុជា ដែលនាំឲ្យខូច កេរ្តិ៍ឈ្មោះអង្ករកម្ពុជាលើទីផ្សារអន្តរជាតិ។

យោងតាមតួលេខនៃការនាំចេញអង្កររបស់ក្រុមការងារផ្នែកស្រូវអង្ករនៃវេទិការាជរដ្ឋាភិបាល-ផ្នែកឯកជនលេខា ធិការដ្ឋានច្រកចេញចូលតែមួយ សម្រាប់បំពេញបែបបទនាំចេញ អង្ករឲ្យ ដឹងថា ១០ខែ ឆ្នាំ២០១៣ កម្ពុជាបាននាំ ចេញអង្ករបាន ២៩៤.១៥៥តោន កើនឡើង ១០០ ភាគរយ បើធៀបនឹងរយៈពេលដូចគ្នានៅឆ្នាំ២០១២ មានត្រឹមតែ ១៤៦.២០០តោន៕

ភ្នំពេញ៖រដ្ឋមន្ត្រីក្រសួងប្រៃសណីយ៍ និងទូរគមនាគមន៍ លោក ប្រាក់ សុខុន បានថ្លែងនៅល្ងាចនៅថ្ងៃទី៩ ខែធ្នូ ឆ្នាំ២០១៣ ឲ្យដឹងថា ការកំណត់តម្លៃសេវាទូរស័ព្ទតាមប្រកាសអន្តរក្រសួងលេខ២៣២ ចុះថ្ងៃទី៧ ខែធ្នូ ឆ្នាំ២០០៩ ដោយកំណត់យក ៤,៥ សេនក្នុង១នាទីសម្រាប់ក្នុងប្រព័ន្ធ និង ៥,៩៥សេន សម្រាប់ក្រៅប្រព័ន្ធ នឹងត្រូវកែប្រែថ្មី ដោយអាចនឹងថ្លៃថោកជាង ៤,៥សេនក្នុង១នាទី។

ថ្លែងក្នុងសន្និសីទសារព័ត៌មានស្តីពីការសម្រេចរបស់រាជរដ្ឋាភិបាលទាក់ទង នឹងបញ្ញត្តិកម្មលើសេវាកម្មទូរស័ព្ទ នៅទីស្តីការក្រសួង លោករដ្ឋមន្ត្រីបានថ្លែងទៀតថា ការដាក់ចេញរបស់រាជរដ្ឋាភិបាល ដោយកំណត់តម្លៃទូរស័ព្ទស្របតាមប្រកាសលេខ ២៣២ ចុះកាលពីឆ្នាំ២០០៩ នោះ គ្រាន់តែជាវិធានការណ៍បណ្តោះអាសន្នប៉ុណ្ណោះ ខណៈក្រសួងប្រៃសណីយ៍បានរយៈបញ្ញត្តិករទូរគមនាគមន៍(TRC) កំពុងសហការជាមួយប្រតិបត្តិករដែលជាក្រុមហ៊ុនទូរស័ព្ទធ្វើការសិក្សា នឹងកំណត់តម្លៃថ្មី ដែលនឹងលេចចេញជារូបរាងនាពេលខាងមុខ។

លោកប្រាក់ សុខុន បានបញ្ជាក់ថា «វិធានការណ៍នេះ (កំណត់តម្លៃតាមប្រកាសអន្តរក្រសួង២៣២) មិនងាប់នៅត្រឹមហ្នឹងទេ ជាវិធានការណ៍បណ្តោះអាស្ននប៉ុណ្ណោះ ដើម្បីធ្វើឲ្យបរិយាកាសនៅក្នុងទីផ្សារទូរគមនាគមន៍មានស្ងប់ស្ងាត់ឡើងវិញ ដោយសារតែមានការប្រកួតប្រជែងជ្រុលខ្លាំងពេកនេះហើយទើបរដ្ឋសំណូមពរធ្វើយ៉ាងម៉េចឲ្យមានភាពស្ងប់ស្ងាត់វិញ ឲ្យក្រុមហ៊ុនទាំងឡាយបែរមក គោរពនូវអ្វីដែលជាការត្រឹមត្រូវ និងបទបញ្ញាតិច្បាប់ទាំងឡាយដែលរដ្ឋបានដាក់ចេញផង។ កន្លងទៅមានក្រុមហ៊ុនមួយចំនួននៅតែបំពាន ឥឡូវតទៅមុខបើថា បំពានទៀត សូមជម្រាបឲ្យហើយ រដ្ឋរក្សាសិទ្ធិក្នុងការអនុវត្តនូវវិន័យម៉ឺងម៉ាត់»។

លោករដ្ឋមន្ត្រីបន្ថែមទៀតថា «រដ្ឋាភិបាលក៏បានប្រគល់សិទ្ធិជូនTRC ជជែកជាមួយប្រតិបត្តិករនានា ហើយធ្វើការសិក្សាបន្ថែមទៀត ដើម្បីពិនិត្យកែសម្រួលការកំណត់ថ្លៃនេះ អីចឹងឥឡូវយើងកំណត់ថា ៤,៥សេន ក្នុងការហៅក្នុងប្រព័ន្ធ ប៉ុន្តែការកំណត់តាំងពី២០០៩ បច្ចេកវិទ្យាទូរគមនាគមន៍ដើរលឿនណាស់ មួយឆ្នាំទៅមួយឆ្នាំ ដោយសារតែបច្ចេកវិទ្យាជឿនលឿន ទំនើប និងការដាក់ទុនវិនិយោគរបស់ក្រុមហ៊ុនជាច្រើន ដើម្បីកែលម្អសេវារបស់ខ្លួន អាចថាតម្លៃនេះ វាថោកជា៤,៥សេនក្នុង១នាទី»។

លោកបន្ថែមទៀតថា TRC បានចាប់ផ្តើមនូវជំហានមួយចំនួនហើយ ដើម្បីធ្វើការងារលើការសិក្សានៃការកំណត់តម្លៃសេវាកម្មទូរស័ព្ទនេះ។

យ៉ាងណាក៏ដោយលោករដ្ឋមន្ត្រី ប្រាក់ សុខុន បានធ្វើការបកស្រាយជុំវិញការកំណត់តម្លៃសេវាកម្មទូរស័ព្ទថា ក្រុមហ៊ុនមួយចំនួនបានកំពុងធ្វើការប្រកួតប្រកួតប្រជែងមិនស្មោះត្រង់នៅក្នុងទីផ្សារទូរគមនាគមន៍កម្ពុជា ដោយយកសេវាទូរស័ព្ទថោកជាងថ្លៃដើម។ ថ្លៃដើមដែលក្រុមហ៊ុនទូរស័ព្ទទាំងអស់កាលពីឆ្នាំ២០០៩ បានព្រមព្រៀងគ្នា កំណត់តម្លៃ ៤,៥សេន​ក្នុងប្រព័ន្ធ និង ៥,៩៥សេនសម្រាប់ក្រៅប្រព័ន្ធ។

លោកថា ការកំណត់តម្លៃនៃការហៅចេញថោកជាងថ្លៃដើមហួសហេតុកំពុងតែកើតមាននៅកម្ពុជាសព្វថ្ងៃ ដែលជាបច្ចេកទេសមួយដែលក្រុមហ៊ុនប្រើសម្រាប់ដណ្តើមយកផ្តាស់មុខ ដើម្បីវាយសម្លាប់គូប្រជែង ដោយថ្ងៃក្រោយនៅសល់តែក្រុមហ៊ុន១ ឬ ២ស្ថានភាពនឹងក្លាយជាអាក្រក់។ 

លោករដ្ឋមន្ត្រីបញ្ជាក់ថា ការប្រកួតប្រជែកលក្ខណៈមិនស្មោះត្រង់បង្កហានិភ័យយ៉ាងច្រើនដល់សង្គម៖ ទី១ – ខុសទៅនឹងច្បាប់ និងវិធានរបស់អង្គការពាណិជ្ជកម្មពិភពលោក (WTO) ដោយកំណត់កុំឲ្យមានការទម្លាក់តម្លៃទាបជាងថ្លៃដើម។ ទី២-ការកើនឡើងបទល្មើសនៃការតភ្ជាប់បណ្តាញទូរស័ព្ទអន្តរជាតិតាមរបៀបខុសច្បាប់ ដែលប្រើប្រាស់វិធីស៊ីមប៉ុក មកពីតម្លៃសេវាទូរស័ព្ទទាបខ្លាំងពេក។ ទី៣-ការធ្លាក់ចុះនៃគុណភាព បានសេចក្តីថា តម្លៃកាន់តែថោក គុណភាពកាន់តែធ្លាក់ចុះ។ និង ទី៤-បច្ឆ័យអាក្រក់នៃការប្រកួតប្រជែងនៃក្រុមហ៊ុននេះគឺការដួលរលំរបស់ក្រុមហ៊ុន ហើយការដូលនេះធ្វើឲ្យនិយោកជិតអត់ការងារធ្វើ បុគ្គិលអត់ការងារ អ្នកប្រើប្រាស់ទូរស័ព្ទបាត់សេចក្តីទុកចិត្តប្រតិបត្តិករ។

ដោយឡែកសម្រាប់ចំណូលដែលបានមកពីវិស័យទូរគមនាគមន៍នេះ ត្រូវបានតំណាងអគ្គនាយដ្ឋានពន្ធដារបានដឹងថា ក្នុងមួយឆ្នាំៗទទួលបានប្រហែលជាង ៨០លានដុល្លារអាមេរិក។ រយៈពេល៥ឆ្នាំចុងក្រោយនេះ ត្រូវបានគត់សម្គាល់ថា ចំណូលដែលបានមកពីវិស័យទូរគមនាគមន៍មិនការកើនឡើងនោះទេ បើទោះចំនួនអ្នកប្រើប្រាស់ការកើនឡើងក្តី។

គួរបញ្ជាក់ថា បច្ចុប្បន្ននេះ មានក្រុមហ៊ុនទូរស័ព្ទ ចំនួន ៩ក្រុមហ៊ុន កំពុងដំណើការ ក្នុងនោះរួមមាន ក្រុមហ៊ុនទូរស័ព្ទ អចល័តចំនួន ២ និង ក្រុមហ៊ុនទូរស័ព្ទ ចល័តចំនួន ៧ រួមមានក្រុមហ៊ុនម៉ូប៊ីថែល , មិត្តហ្វូន, ប៊ីឡាញ , ស្មាតម៉ូបាល, ឃ្យូប៊ី , អ៊ិចហ្សែល និង ខូតែល។ យ៉ាងហោចណាស់ ស៊ីមកាតប្រមាណ ២០លាន ត្រូវបានប្រជាជននៅកម្ពុជា ប្រើប្រាស់នាពេល បច្ចុប្បន្ននេះ៕

ភ្នំពេញ ៖  បើយោងតាមរបាយការណ៍ ជាផ្លូវការមួយបានឲ្យដឹងថា ចំនួនអ្នកប្រើប្រាស់ប្រព័ន្ធ ទូរស័ព្ទ និងអ៉ីនធើណែត នៅកម្ពុជា មានការកើនឡើងខ្លាំង នៅរយៈពេលប៉ុន្មានឆ្នាំ ចុងក្រោយនេះ ប៉ុន្តែចំណូលទៅកាន់រដ្ឋគឺមានបរិមាណនៅដដែល។

លោក ជូ វិជិត្ត រដ្ឋលេខាធិការ ក្រសួងសេដ្ឋកិច្ចនិងហិរញ្ញវត្ថុ បានថ្លែងនៅក្នុងសន្និសីទកាសែត មួយ ដែលបានធ្វើឡើងកាលពីថ្ងៃទី៩ ខែធ្នូ ឆ្នាំ២០១៣កន្លងទៅ នៅក្រសួងប្រៃសណីយ៍ បានឲ្យដឹងថា កាលពីឆ្នាំ២០០៨កន្លងទៅ ចំនួនអ្នកប្រើប្រាស់ស៊ីមប្រព័ន្ធទូរស័ព្ទ មានជាង ៣,៨លានស៊ីម និងអ្នកប្រើប្រាស់អ៉ីនធើណែត មានចំនួនជាង ២ម៉ឺននាក់ ហើយមកដល់ឆ្នាំ ២០១២នេះ ចំនួនអ្នកប្រើប្រាស់ស៊ីមប្រព័ន្ធទូរស័ព្ទ មានជាង ១៩លានស៊ីម និងចំនួន អ្នកប្រើប្រាស់អ៉ីនធើណែត មានជាង ២,៧លាននាក់ នេះបើយោងតាមរបាយការណ៍ យុទ្ធសាស្រ្តចតុកោណ ដំណាក់កាលទី៣ របស់រដ្ឋាភិបាល។

លោកបានថ្លែងបន្តថា «បើគិតរយៈពេល៥ឆ្នាំចុងក្រោយនេះ ពីឆ្នាំ២០០៨ មកទល់ឆ្នាំ២០១២ ចំនួននៃអ្នកប្រើប្រាស់ ស៊ីមទូរស័ព្ទ មានការកើនឡើងជាង ៥ដង ប៉ុន្តែសម្រាប់ចំណូល ទៅកាន់រដ្ឋវិញ គឺមានបរិមាណ ហាក់នៅដដែល មិនមានការកើនឡើងនោះទេ ដោយមានចំនួនក្រោម ៨០ពាន់លានដុល្លារ សហរដ្ឋអាម៉េរិកតែប៉ុណ្ណោះ»។

លោកបានថ្លែងថែមទៀតថា ហេតុផលដែលធ្វើឲ្យចំណូលទៅកាន់រដ្ឋ មិនមានការកើនឡើង គឺដោយសារតែក្រុមហ៊ុនផ្តល់ប្រព័ន្ធទូរស័ព្ទ មានការប្រកួតប្រជែងមិនស្មោះត្រង់ ដោយបានកំណត់តម្លៃ ពុំមានការកំណត់ត្រឹមត្រូវ ទៅតាមច្បាប់មាត្រដ្ឋាន ដោយទង្វើបែបនេះ បានធ្វើឲ្យដៃគូប្រកួតប្រជែងមួយចំនួន មានការដួលរលំ ហើយអនាគត អាចនឹងធ្វើឲ្យ ទីផ្សារទូរគមនាគមន៍ ឈានទៅរកការដួលរលំ នៅថ្ងៃណាមួយជាក់ជាមិនខាន។

ទោះបីជាមានការតវ៉ា បន្ទាប់ពីមានការអន្តរាគមន៍ ទៅលើវិស័យទូរគមនាគមន៍ ឲ្យមានតម្លៃអប្បរមាក៏ដោយ ប៉ុន្តែលោក ជូ វិជិត្ត បានឲ្យដឹងថា នេះគ្រាន់តែជាវិធានការ បណ្តោះអាសន្នតែប៉ុណ្ណោះ ហើយយើងនឹងបានការពិភាក្សាបន្តទៀត ដើម្បីធ្វើឲ្យវិស័យទូរគមនាគមន៍កម្ពុជា មានសុខភាពទាំងរដ្ឋ ក្រសួង និងអតិថិជន ក្នុងការទទួលបានសេវាកម្មល្អ ព្រមទាំងតម្លៃសមរម្យ៕

ភ្នំពេញៈ ប្រធានទីភ្នាក់ងារទេសចរណ៍ លោក អាង គឹមអៀង បានថ្លែងស្វាគមន៍ចំពោះ ការមកដល់នៃក្រុមហ៊ុនអាកាសចរណ៍អន្តរជាតិអប្សរាអ៊ែរ (Apsara International Ari) ដែលគ្រោងនឹងបើកប្រតិបត្តិការដឹកជញ្ជូនភ្ញៀវនៅឆ្នាំ២០១៤ ខាងមុខនេះ។

លោក អាង គឹមអៀង បានមានប្រសាសន៍ប្រាប់មជ្ឈមណ្ឌលព័ត៌មានដើមអម្ពិលតាមទូរស័ព្ទ នៅថ្ងៃទី០៥ ខែធ្នូ ឆ្នាំ២០១៣ថា លោកសូមស្វាគមន៍ និងសម្ដែងការសាទរ ចំពោះគ្រោងការបើកប្រតិបត្តិការរកស៊ីរបស់ក្រុមហ៊ុនអាកាសចរណ៍អប្សរាអ៊ែរ ដែលជាការវិនិយោគរួមគ្នារវាងវិនិយោគិនចិន និងវិនិយោគិនកម្ពុជា ហើយគ្រោងនឹងចាប់ផ្ដើមហោះហើរ នាឆ្នាំក្រោយនេះ ។

ប្រធានទីភ្នាក់ងារទេសចរណ៍រូបនេះ បានអះអាងថា វត្តមានរបស់ក្រុមហ៊ុនអាកាសចរណ៍អប្សរាអ៊ែរ នៅលើទឹកដីកម្ពុជា នឹងផ្ដល់ប្រយោជន៍ទាំងវិស័យទេសចរណ៍ សេដ្ឋកិច្ច និងនយោបាយ ។ ក្រុមហ៊ុនអាកាសចរណ៍អប្សរាអ៊ែរនេះ បានទទួលការយល់ព្រមជាគោលការណ៍ពីរដ្ឋាភិបាលរួចហើយ និងកំពុងស្ថិតក្នុងដំណាក់កាលរៀបចំឯកសារ ដាក់ទៅរដ្ឋលេខាធិការដ្ឋានអាកាសចរណ៍ស៊ីវិល សម្រាប់សុំវិញ្ញាប័នប័ត្រហោះហើរ ។

យ៉ាងណាក៏ដោយប្រធានទីភ្នាក់ងារទេសចរណ៍លោក អាង គឹមអៀង ក៏បានស្នើរដល់ក្រុមហ៊ុនអាកាសចរណ៍នានា ដែលបានបើកប្រតិបត្តិការរកស៊ីនៅកម្ពុជាឲ្យមានឆន្ទៈពិតប្រាកដក្នុងការប្រកបអាជីវកម្ម ។ ការលើកឡើងដូច្នេះ ក៏ព្រោះតែលោកមើលឃើញថា មានក្រុមហ៊ុនមួយចំនួន ដែលបានអាជ្ញាប័ណ្ណពីអាកាសចរណ៍ស៊ីវិលហើយនោះ ពួកគេមិនឃើញបើកប្រតិបត្តិការហោះហើរនោះ ពោលគឺត្រឹមបានឱបអាជ្ញាប័ណ្ណទុក ។

លោក អាង គឹមអៀង បានថ្លែងថា «តាមការកត់សម្គាល់របស់ខ្ញុំ យ៉ាងតិចមានក្រុមហ៊ុនអាកាសចរណ៍ ៥ដែលទទួលបានអាជ្ញាប័ណ្ណហើយ មិនព្រមបើកប្រតិបត្តិការហោះហើរ» ។

ពាក់ព័ន្ធនឹងបញ្ហានេះលោកអំពាវនាវឲ្យរដ្ឋាភិបាល ដែលជាអ្នកផ្ដល់អាជ្ញាប័ណ្ណ មេត្តាពិនិត្យសើររើស ក្រុមហ៊ុនដែលទទួលបានអាជ្ញាប័ណ្ណមិនព្រមប្រតិបត្តិការ ដើម្បីអនុញ្ញាតឲ្យអ្នកវិនិយោគដទៃ ដែលចង់រកស៊ីវិស័យនេះ មានលទ្ធភាពបើកអាជីវកម្មរបស់ខ្លួន ។

គួរបញ្ជាក់ថា បើតាមអាកាសយានដ្ឋានអន្តរជាតិកម្ពុជា សព្វថ្ងៃនេះក្រុមហ៊ុនអាកាសចរណ៍ចំនួន២១ ក្រុមហ៊ុនបានកំពុងបើប្រតិបត្តិការណ៍ហោះហើរនៅកម្ពុជា៕

ភ្នំពេញ៖ក្រុមហ៊ុនទូរស័ព្ទចល័តទាំងអស់នឹងត្រូវបញ្ចប់ការផ្តល់លុយបន្ថែម យ៉ាងយូរបំផុតត្រឹមថ្ងៃទី៦ ខែធ្នូ ឆ្នាំ២០១៣នេះ ដើម្បីអនុវត្តតាម ស.ជ.ណ របស់ទីស្តីការគណៈរដ្ឋមន្ត្រីចុះថ្ងៃទី២១ ខែវិច្ឆិកា ឆ្នាំ២០១៣ បានបញ្ជាឲ្យក្រុមហ៊ុនទូរស័ព្ទចល័តទាំងគិតតម្លៃហៅចេញ-ចូល តាមប្រកាសអន្តរក្រសួង(ក្រសួងប្រៃសណីយ៍ និងសេដ្ឋកិច្ច) លេខ ២៣២ កាលពីថ្ងៃទី៧ ធ្នូ ឆ្នាំ២០០៩ ដែលអត្រាហៅចេញក្នុងប្រព័ន្ធទាបបំផុត ៤,៥សេនក្នុង១នាទី និង ហៅក្រៅប្រព័ន្ធទាបបំផុត ៥,៩៥ សេន ក្នុង១នាទី។

សមាជិកទី១នៃបញ្ញតិករទូរគមនាគមន៍ និងជាអ្នកនាំពាក្យ លោក ឡាយ ម៉ារ៉ូ  បានប្រាប់មជ្ឈមណ្ឌលព័ត៌មានដើមអម្ពិលនៅព្រឹកថ្ងៃទី៤ ខែធ្នូ ឆ្នាំ២០១៣នេះ ថា ស.ជ.ណ របស់ទីស្តីការគណៈរដ្ឋមន្ត្រីបានដាក់កំហឹតឲ្យបណ្តាលក្រុមហ៊ុនទូរស័ព្ទទាំងអស់ដែលកំពុងប្រើប្រាស់កម្មវិធីបន្ថែមទឹកប្រាក់ហៅចូល និងហៅចេញ ផ្ទុយពីប្រកាសអន្តរក្រសួងកាលពីឆ្នាំ២០០៩ ឲ្យត្រឡប់មកគោរពតាមប្រកាសនេះវិញ ព្រោះថា បច្ចុប្បន្នមានក្រុមហ៊ុនចំនួនបានប្រើប្រាស់កម្មវិធីប្រ៉ូម៉ូសិន ការហៅចេញចូលទូរស័ព្ទតម្លៃទាបយ៉ាងខ្លាំង ដែលធ្វើខាតប្រយោជន៍ដល់រាជរដ្ឋាភិបាល។

ខាតប្រយោជន៍នៅត្រង់ថា ក្រុមហ៊ុនទាំងនោះបានបញ្ចុះតម្លៃនៃការហៅចេញ-ចូល ទាប ដើម្បីឲ្យពួកគេដណ្តើមបានទីផ្សារធំ ជាហេតុទទួលបានចំណូលទាប ហើយដល់ពេលប្រកាសចំណូលឃើញថាខាត នោះហើយនាំឲ្យរាជរដ្ឋាភិបាលបាត់ចំណូលពន្ធ។ លើសពីនេះការបណ្តុះតម្លៃទាបរបស់ក្រុមហ៊ុនទូរស័ព្ទនេះ ធ្វើការប្រកួតប្រជែងយ៉ាងខ្លាំង ពីបណ្តាក្រុមហ៊ុនទូរស័ព្ទចល័ត ដូចគ្នា ដែលជាហេតុធ្វើក្រុមហ៊ុនមួយចំនួនមិនអាចទ្រំាទ្របានក៏ដួលរលំ។

លោកបន្តថា «យ៉ាងយូរត្រឹមថ្ងៃទី០៦ ខែធ្នូ ឆ្នាំ២០១៣ នេះក្រុមហ៊ុនទូរស័ព្ទចល័តទាំងអស់ត្រូវ បញ្ចប់ការផ្តល់លុយបន្ថែម ដែលផ្ទុយពីច្បាប់បានកំណត់»។

យ៉ាងណាក៏ដោយគេនៅចាំបានថា កាលពីចុងខែមេសាឆ្នាំ២០១៣ ពោលគឺមុនការបោះឆ្នោតមកដល់បញ្ញតិ្តករទូរគមនាគមន៍ និង បណ្តាលក្រុមហ៊ុនទូរស័ព្ទចល័តទាំងអស់បានឯកភាពគ្នាអនុវត្តការយកតម្លៃសេវាស្របតាមប្រកាសអន្តរក្រសួងដែលចុងថ្ងៃទី៧ ខែធ្នូ ឆ្នាំ២០០៩ តែមិនបានប៉ុន្មានថ្ងៃផង ដោយមានការតវ៉ាយ៉ាងផុសផុលពេក ជាពិសេសនៅតាមបណ្តាញទំនាក់ទំនងសង្គមហ្វេសប៊ុក ពេលនោះកាលដែលលោក សូរ ឃុន ជារដ្ឋមន្ត្រីក្រសួងប្រៃសណីយ៍ និងទូរគមនាគមន៍ក៏ បានចេញសេចក្តីប្រកាសអនុញ្ញាតិឲ្យមានការផ្តល់លុយបន្ថែម និងប្រ៉ូម៉ូសិនពិសេសឡើងវិញ។

តែសម្រាប់ពេលនេះ អ្នកនាំពាក្យរបស់បញ្ញតិករទូរគមនាគមន៍ លោក ឡាយ ម៉ាវ៉ូ បានអះអាង ថា គ្មានឡើយដូចពេលមុនទេ បានសេចក្តីថា មិនមានការកែប្រែផ្ទុយពីប្រកាសអន្តរក្រសួងកាលពីឆ្នាំ២០០៩នោះឡើយ។

គួរបញ្ជាក់ថា បច្ចុប្បន្ននេះ មានក្រុមហ៊ុនទូរស័ព្ទចំនួន ៩ក្រុមហ៊ុន កំពុងដំណើការ ក្នុងនោះរួមមានក្រុមហ៊ុទូរស័ព្ទអចល័តចំនួន ២ និង ក្រុមហ៊ុនទូរស័ព្ទចល័តចំនួន ៧  រួមមានក្រុមហ៊ុនម៉ូប៊ីថែល , មិត្តហ្វូន, ប៊ីឡាញ , ស្មាតម៉ូបាល, ឃ្យូប៊ី , អ៊ិចហ្សែល និង ខូតែល។ យ៉ាងហោចណាស់ ស៊ីមកាតប្រមាណ ២០លានស៊ីមកាត ត្រូវបានប្រជាជននៅកម្ពុជា ប្រើប្រាស់នាពេលបច្ចុប្បន្ននេះ៕

ភ្នំពេញ៖ ក្រសួងសុខាភិបាលនៅថ្ងៃទី៤ ខែធ្នូនេះ បានចេញសេចក្តីប្រកាស ដោយអំពាវនាវដល់ ប្រជាពលរដ្ឋនៅទូទាំងប្រទេស ឲ្យធ្វើការប្រុងប្រយ័ត្នខ្ពស់ ចំពោះសុខភាពខណៈអាកាសធាតុប្រទេសកម្ពុជាចាប់ផ្តើមចុះត្រជាក់។

យោងតាមសេចក្តីប្រកាសព័ត៌មានរួមរបស់ក្រសួងសុខាភិបាល និងអង្កការសុខភាពពិភពលោកដែលមជ្ឈមណ្ឌលដើមអម្ពិលទទួលបានឲ្យដឹងថា ក្នុងអំឡុងពេលអាកាសធាតុត្រជាក់ ច​ន្លោះពីខែធ្នូ ដល់ខែមករា ជំងឺដែលកើតមានញឹកញាប់ គឺជាជំងឺផ្លូវដង្ហើមបណ្តាលមកពីវីរុស ដូចជាគ្រុនផ្តាសាយ រលាកបំពង់ក៏ ដោយមេរោគស្ត្រិបតូកូក និងរលាកក្រពះពោះវៀនដោយវីរុស។

ចំពោះជំងឺខាងលើនេះ ក្រសួងបានបង្ហាញវិធានការណ៍មួយចំនួនក្នុងការអនុវត្តដើម្បីថែរក្សាខ្លួន និង អ្នកដទៃរួមមាន៖

-ចូរស្វែងរក ការព្យាបាលវេជ្ជសាស្ត្រ នៅគ្រឹះស្ថានសុខភាពសាធារណៈ ប្រសិនបើអ្នកមានរោគសញ្ញា ពិបាកដកដង្ហើម គ្រុនក្តៅ ក្អក ឈឺក និង ឈឺសាច់ដុំ។

-ចូរចាំថា ធ្វើដំណើរ តែនៅពេលដែលអ្នកមានសុខភាពល្អ។ ប្រសិនបើអ្នកគិតថា អ្នកមានជំងឺផ្តាសាយ ឫមិនស្រួលខ្លួន (ឈឺ) សូមអ្នកពន្យារផែនការធ្វើដំណើររបស់អ្នក រហូតដល់់គ្រុនក្តៅ បាត់ទៅវិញ យ៉ាងហោចណាស់ ២៤ម៉ោង។ គ្រុនក្តៅរបស់អ្នកនិងបាត់ទៅវិញ ដោយមិនចាំបាច់ប្រើប្រាស់ឱសថបញ្ចុះកកម្តៅ។

-ពេលអ្នក ក្អក ឬ កណ្តាស់ សូមខ្ទប់មាត់របស់អ្នកជាមួយក្រណាត់ ឬកន្សែង។ បើគ្មានក្រណាត់ ឬកន្សែង សូមក្អក ឬកណ្តាស់ដោយយកដៃអាវខ្ទប់ មិនត្រូវប្រើដៃរបស់អ្នកទេ។

-លាងសម្អាត ដៃ របស់អ្នកឲ្យបានញឹកញាប់ ជាមួយសាប៊ូ និងទឹក។

-ជៀងវាង ប៉ះ ភ្នែក ច្រមុះ និងមាត់របស់អ្នក។

-ជៀងវាងទំនាក់ទំនងយ៉ាងជិតស្និទជាមួយអ្នកជំងឺ។

សេចក្តីប្រកាសបន្ថែមថា ទារក កុមារ និងមនុស្សមានវ័យចំណាស់ មានហានិភ័យខ្ពស់ទាក់ទងនឹងជំងឺ បណ្តាលមកពីអាកាសធាតុត្រជាក់។ ទារក បាត់បង់កំដៅរាងកាយ រហ័សជាងមនុស្សធំ។ លើសពីនេះទៅទៀត ទារក និងកុមារតូមិនអាចរក្សាកំដៅរាងកាយឲ្យបានគ្រប់បានទេ។

-ទារកអាយុតិចជាងមួយឆ្នាំ មិនគួរឲ្យដេកនៅក្នុងបន្ទប់ត្រជាក់ទេ។ ការផ្តល់សំលៀកបំពាក់ដែលកក់ក្តៅ និងភួយសម្រាប់ទារក និងព្យាយាមរក្សាសីតុណ្ហភាពឲ្យបានកក់ក្តៅនៅក្នុង បន្ទប់របស់ទារក។

-មនុស្សវ័យចំណាស់ជាញឹកញាប់មានកំដៅរាងកាយតិច ដោយសារតែការរំលាយអាហារក្នុងរាងកាយយឺត និងសកម្មភាពរាងកាយមានតិច។ មនុស្សវ័យចំណាស់ក៏​មានហានិភ័យដែរ ដែលធ្វើឲ្យសីតុណ្ហភាពក្នុងរាងកាយថយចុះជាងធម្មតាដែលអាចបណ្តាលឲ្យស្លាប់ ដោយសារតែ ការឆ្លើយតបរបស់រាងកាយជាមួយភាពត្រជាក់ជាពិសេស អ្នកមានជំងឺទឹកនោមផ្អែម។

-កុមារ និងមនុស្សចាស់ គួរតែ ពាក់សម្លៀកបំពាក់ច្រើនជាន់ពេលអាកាសធាតុត្រជាក់។ សំលៀកបំពាក់ច្រើនជាន់ ដើម្បីរក្សាភាពកក់ក្តៅ ក្នុងខ្លួនគាត់។ ជៀសវាងការប្រើសំលៀកបំពាក់តឹងពីព្រោះ វាមិនអនុញ្ញឲ្យឈាមចរាចរស្រួលក្នុងរាងកាយ និងបណ្តាលឲ្យបាត់បង់កំដៅរាងកាយ។

-កុមារ និងមនុស្សវ័យចំណាស់ គួរពាក់មួក សំលៀកបំពាក់ដែលនាំឲ្យកក់ក្តៅ និង ស្រោមជើង នៅពេលចេញទៅខាងក្រៅ នៅក្នុងអាកាសធាតុត្រជាក់ ដើម្បីរក្សាកំដៅក្នុងរាងកាយ ដែលនឹងបាត់បង់តាមរយៈដៃ ក្បាល និងជើង។

គួរបញ្ជាក់ថា ក្រសួងធនធានទឹក និងឧតុនិយម កាលពីថ្ងៃទី២១ ខែវិច្ឆិកា កន្លងទៅថ្មីៗនេះ បានអំពាវនាវឲ្យវីរៈកងទ័ព ដែលកំពុងឈរជើងតាមបន្ទាត់ព្រំដែន កម្ពុជា-ថៃ ត្រូវបង្កើនការយកចិត្តទុកដាក់ ប្រុងប្រយ័ត្នចំពោះ ការប្រែប្រួលអាកាសធាតុ ដែលកំពុងតែកើតមានឡើង នៅកម្ពុជាបច្ចុប្បន្ននេះ។

យោងតាមសេចក្តីជូនដំណឹង របស់ក្រសួងធនធានទឹក ដែលមជ្ឈមណ្ឌលព័ត៌មាន ដើមអម្ពិល ទទួលបាននៅថ្ងៃទី២១ ខែវិច្ឆិកា ឆ្នាំ២០១៣នេះ បានឲ្យដឹងថា “សូម បង្កើនការយកចិត្តទុកដាក់ ប្រុងប្រយ័ត្នខ្ពស់ចំពោះបញ្ហាសុខភាព ដែលអាចបង្កឲ្យមានជំងឺផ្សេងៗ បណ្តាលមកពីអាកាសធាតុចុះត្រជាក់ខ្លាំង”។

សេចក្តីជូនដំណឹងខាងលើបន្តថា នៅថ្ងៃទី២១ ខែវិច្ឆិកានេះ ជ្រលងសម្ពាធខ្ពស់ ស៊ីបេរី និងមូសុងឥសាន បានចាប់ផ្តើមមានឥទ្ធិពលមកលើកម្ពុជា ហើយបាតុភូត ធម្មជាតិនេះ នឹងបង្កើនឥទ្ធិពលកាន់តែខ្លាំង ក្នុងចន្លោះពេលចាប់ពីពាក់កណ្តាលខែធ្នូ ឆ្នាំ២០១៣ ដល់ពាក់កណ្តាលខែមករា ឆ្នាំ២០១៤។

ប្រភពខាងលើបន្ថែមថា ស្ថានភាពបែបនេះ នឹងធ្វើឲ្យអាកាសនៅកម្ពុជានារដូវរំហើយនេះ មានសភាពត្រជាក់ខ្លាំងជាងបណ្តាឆ្នាំកន្លងទៅ ពិសេសចាប់ពីពាក់កណ្តាល ខែធ្នូ ឆ្នាំ២០១៣ ដល់ពាក់កណ្តាលខែមករា ឆ្នាំ២០១៤ដែលក្នុងអំឡុងពេលនេះ នៅថ្ងៃខ្លះ សីតុណ្ហភាពអប្បបរមា នៅតាមតំបន់នានា អាចនឹងធ្លាក់ចុះ៕

ភ្នំពេញ: ក្រសួង​សេដ្ឋកិច្ច និង​ហិរញ្ញវត្ថុ បានប្រកាសមួយស្នើឲ្យបណ្តា ម្ចាស់បុរីអត់ច្បាប់មក សុំអជ្ញាបណ្ណពីក្រសួង ហើយប្រាប់ កុំឲ្យប្រជាពលរដ្ឋទិញបុរីចំនួន ១៩ ដែលអត់ច្បាប់ ដែលមានទីតាំងស្ថិតនៅរាជធានីភ្នំពេញ។

​សេចក្តីជូនដំណឹង​ចុះ​ថ្ងៃទី​២៧ ខែវិច្ឆិកា ឆ្នាំ​២០១៣ របស់​ក្រសួង​សេដ្ឋកិច្ច និង​ហិរញ្ញវត្ថុបាន

ឲ្យដឹងថា បុរីអត់ច្បាប់នោះរួមមាន ៖ ១-​បុរី សូ​នី​, ២-​បុរី វា​រី​ណា,៣-​បុរី រុង រឿង,​ ៤-​បុរី គៀង ហ៊​ត​, ៥-​បុរី សម្បួរមាស​, ៦-​ផ្លា​ទី​នី​ម រេ​ស៊ី​ដិ​ន​, ៧-​បុរី អាកាសចរណ៍​, ៨-​ក្រុមហ៊ុន ប៊ូ​យ៉ុង​ហ្គ្រុ​ប​, ៩-​បុរី EU ( កំពង់ចម្លង អរិយ​ក្សត្រ ), ១០-​ក្រុមហ៊ុន មានជ័យ​ហ្វូ​ដ ៩៩៩ ( គម្រោង​បុរី តូ​ក្យូ​, គម្រោង​មូ​ស្គូ​ស៊ី​ធី និង​ផ្លូវ ៣៧១ ), ១១-​សំណង់ផ្ទះ​ល្វែង​ទំនើប ចោមចៅ​, ១២-​អា​ផាត​មិន Sonatra Grand Realty, ១៣-​សំណង់ផ្ទះ​ល្វែង លោក អ៊ីវ ឈាន​ ,១៤-​អគារ​ស្នាក់នៅ​រួម D.Y.G Co., Ltd ( Noblesse ), ១៥-​សំណង់ផ្ទះ​ល្វែង​លោក អ៊ីវ ម៉េង និង​លោក ជា លី​, ១៦-​សំណង់ផ្ទះ​ល្វែង និង Link House លោក គីម យ៉ុង​ហាក់​, ១៧-​សំណង់​អគារ​ស្នាក់នៅ​រួម លោក ទិ​ព្ធ ណា​រេ​ន និង​លោកស្រី អ៊ា​ក ច័ន្ទ​ថា​វី​, ១៨-​សំណង់​អគារ​ស្នាក់នៅ​រួម លោក យ៉ង់ គ្រី​ស្យ​ង់ និង​លោក យ៉ង់ លឹម​ហួត​ និង  ១៩-​សំណង់ផ្ទះ​ល្វែង តុល លន​។

សេចក្តីប្រកាសដដែលបន្តថា «​សាធារណៈជន​ទាំងអស់​ថា មិនគួរ​គប្បី​ទិញ​លំនៅដ្ឋាន​ទាំងឡាយណា ដែល​ពុំទាន់​មាន​អាជ្ញាប័ណ្ណ​អាជីវកម្ម​អភិវឌ្ឍ​លំនៅដ្ឋាន ពី​ក្រសួង​សេដ្ឋកិច្ច និង​ហិរញ្ញវត្ថុ​នោះឡើយ ព្រោះ​ការទិញ​លំនៅដ្ឋាន​ពី​ម្ចាស់​សំណង់ ឬ​បុរី ដែល​គ្មាន​ការអនុញ្ញាត​ស្របច្បាប់​អាច​នឹង​ខាតបង់​ថវិកា ឬ​ទ្រព្យសម្បត្តិ ជាយថាហេតុ​»។

សេចក្តីជូនដំណឹងឲ្យដឹងទៀតថា ​ម្ចាស់​បុរីទាំងអស់ ​ត្រូវ​រួសរាន់​មក​ដាក់​ពាក្យស្នើសុំ​អាជ្ញាប័ណ្ណ​អាជីវកម្ម​អភិវឌ្ឍ​ លំនៅដ្ឋាន នៅ​អគ្គនាយកដ្ឋាន​ឧស្សាហកម្ម​ហិរញ្ញវត្ថុ នៃ​ក្រសួង​សេដ្ឋកិច្ច និង​ហិរញ្ញវត្ថុ ឲ្យ​បាន​មុន​ថ្ងៃទី​២០ ខែធ្នូ ឆ្នាំ​២០១៣​។ ក្នុងករណី​យឺតយ៉ាវ ឬ​ព្រងើយកន្តើយ មិន​ព្រម​មក​ដាក់​ពាក្យសុំ​អាជ្ញាប័ណ្ណ​អាជីវកម្ម​អភិវឌ្ឍ​លំនៅឋាន ក្រសួង​សេដ្ឋកិច្ច និង​ហិរញ្ញវត្ថុ នឹង​ចាត់វិធានការ តាមផ្លូវ​ច្បាប់​ជា​ធរមាន​។

​យ៉ាងណាក៏ដោយនេះមិនមែនជាលើកទី១ទេ ដែលក្រសួងចេញសេចក្តីជូនដំណឹងឲ្យម្ចាស់បុរីមកសុំអជ្ញាបណ្ណ និងប្រកាសមិនឲ្យប្រជាពលរដ្ឋទិញបុរីទាំងអស់ ហើយថែមទាំងដោយដាក់កាលបរិច្ឆេទកំណត់ផងដែរ ប៉ុន្តែពួកគេ(ម្ចាស់បុរី) នៅតែមិនព្រមអនុវត្តតាមច្បាស់ ហើយក្រសួងសេដ្ឋកិច្ចនៅតែមិនទាន់មានវិធានការណ៍ច្បាស់លាស់ណាមួយនៅឡើយ។ ប្រជាពលរដ្ឋមួយចំនួននិយាយថា ដើម្បីជាផលប្រយោជន៍ប្រជាជនដែលចង់ទិញបុរី ហើយមិនដឹងព័ត៌មាន អជ្ញាធរពាក់ព័ន្ធគួរតែចាត់វិធានការណ៍ជាបន្ទាន់៕