ប្អូនប្រុសប្អូនស្រី                ផ្តុំគ្នាធ្វើអី                         យប់ជ្រៅទៅហើយ

កូវីដវាយលុក                   មិនដឹងថ្ងៃស្បើយ               ចុះហេតុម្តេចឡើយ

ជួបជុំក្រៅផ្ទះ?

ជាប់ប្រកៀកគ្នា                 ឆ្លើយ​ឆ្លងសន្ទ​នា                ទៅមកពេញពាស

គ្មានម៉ាសអាល់កុល           ជាប់ខ្លួនពៅមាស               ម្នាក់ៗមានៈ

ផ្គើន​ការណែនាំ។

កូវីដវិបល្លាស                   ចាំឆ្មក់ឱកាស                   នាំយើងគ្រាគ្រាំ

ពេលវេលានេះ                  ប្អូនៗត្រូវទ្រាំ                    គោរពឲ្យ​មាំ

បីការពារ-កុំ៕

បឹងស្នោសំរោង​
សម្រស់ជាប់តោង
គន់មិនជិនណាយ​
បក្សីបក្សា​
រុក្ខាទាំងឡាយ​
រីករាយសប្បាយ
តាមទឹករលក។

នឹករឿងថ្មីចាស់​
វេលាប្តូរផ្លាស់​
មិនអាចវិលរក
អនុស្សាវរីយ៍​
មូលមីទៅមក​
តែចិត្តនឹកភ្នក
ឧត្តរមានជ័យ​។

(បទអើយរ៉ា)

កូវីដ           អើយរ៉ា       ១៩

រុកកួន        អើយរ៉ា       យើងរាល់ថ្ងៃ

ជំងឺ             អើយរ៉ា       សាហាវក្រៃ

មាត់ដៃ       អើយរ៉ា       ឆ្លងគ្រប់គ្រា។

ត្រូវតែ        អើយរ៉ា       ប្រឹងកម្ចាត់

ទប់ស្កាត់     អើយរ៉ា       រាល់វេលា

ពាក់ម៉ាស   អើយរ៉ា       ឲ្យគ្រប់​គ្នា

ឈឺជា         អើយរ៉ា       កុំប្រមាទ។

រក្សា           អើយរ៉ា       គម្លាតឆ្ងាយ

រាងកាយ    អើយរ៉ា       ដៃស្អាតបាត

ប្រើជែល     អើយរ៉ា       លាងសម្អាត

ឆ្លៀវឆ្លាត    អើយរ៉ា​       កុំប្រហែស។

ប៉ះពាល់     អើយរ៉ា       ផ្ទាល់មិនផ្ទាល់

ពិភាល់       អើយរ៉ា       កុំគេចវេះ

ម្នីម្នា           អើយរ៉ា       ទៅធ្វើតេស្ត

ចចេស       អើយរ៉ា       នាំចង្រៃ។

ចត្តា           អើយរ៉ា       ឡីស័កច្បាស់

កុំប្រាស់      អើយរ៉ា       ចាកឆ្ងាយក្រៃ

ស៊ូ​ទ្រាំ         អើយរ៉ា       ១៤ថ្ងៃ

ថ្លាថ្លៃ          អើយរ៉ា       ធ្វើឲ្យ​បាន។

វេលា          អើយរ៉ា       ដ៏លំបាក

នឹងស្រាក   អើយរ៉ា       ជាមិន​ខាន

គ្រប់រូប       អើយរ៉ា       ត្រូវក្លាហាន

ប្រឹងច្រាន   អើយរ៉ា       រោគអប្រិយ៕

ដោយ អ៊ឹង ចំរើន (ថ្ងៃទី៦ ខែធ្នូ ឆ្នាំ​២០២០)

កំណាព្យ បទកាកគតិ

គូកម្ម​មិន​គាប់– ធ្លាប់និត្យនៅជាប់– ឥលូវព្រាត់គ្នា

អូន​បាន​គូផ្សេង–បងរែងគ្រាំ​គ្រា–នឹក​ដល់​ស្ងួនភ្ងា

ទ្រម្ចាស់​តែមួយ។

បងក៏មាន​ថ្មី–តែមិនមានន័យ–ទេបណ្តូល​ត្រួយ

គេផ្ទៀង​ផ្ទឹមខុស–នាំ​​ពុះរញ្ជួយ–ព្រួយអើយព្រួយ

នឹកពេញឱរា។

ឱម្ចាស់ទាំងឡាយ– ពេល​ដើរសប្បាយ–ឬទៅ​វត្តវ៉ា

កុំបីភ្លាំងភ្លេច–បិទធ្មេចនេត្រា–នាំគូស្នេហា

ស្បែកជើងប្រាសព្រាត់៕

ដោយ អ៊ឹង ចំរើន (ថ្ងៃទី​២៧ ខែសីហា ឆ្នាំ២០២០)

«#បទនមោ»

ន-នឹងធ្វើអ្វីកុំភ្លេចខ្លួន មោ-មានសីលក្បួនជាប់រាល់ថ្ងៃ
ព-ពុកម៉ែយើងមានគុណក្រៃ ទ្ធា-ធនណាថ្លៃពុំស្មើឡើយ។

យ-យើងកូនខ្មែរតាមព្រះពុទ្ធ សិ-សិក្ខាបទមានច្រើនហើយ
ទ្ធំ-ធម៌ព្រះអង្គនាំដល់ត្រើយ អ-អស់លោកអើយប្រឹងធ្វើល្អ។

អា-រាមវត្តវ៉ាកុំបំភ្លេច ឥ-ឥតគួរគេចចិត្តស្មោះសរ
ឦ-ឥឡូវនេះត្បិតកម្រ ឧ-ឧបការធម៌សន្សំបុណ្យ។

ឪ-ឪម៉ែថ្លៃហួសប្រមាណ ឫ-រកអ្វីគ្មានឲ្យស្មើគុណ
ឬ-រែកពុំកើតត្បិតសែនធ្ងន់ ឭឮ-ហើយគន់គិតឲ្យច្បាស់។

ឯ-ព្រះត្រៃរត្នត្រូវបូជា ព្ធ-អែលអល់ពារនាំកម្មក្រាស់
ឱ-អើចិត្តអើយកុំក្រឡាស់ ឧ-ឪម៉ែច្បាស់ព្រះកន្លោង។

អុំ-អង្គព្រះពុទ្ធប្រដៅថា អំ-ពើថ្លៃថ្លាត្រូវចាប់ឆោង
អាំ-ឲ្យខ្លួនយើងចាកសៅហ្មង អះ-អស់បំណងតែងដូចចិត្ត។

សរសេរកាលពីថ្ងៃទី១៧ ខែកក្កដា ឆ្នាំ២០០៥

ដោយ អ៊ឹង ចំរើន 

រឿងរ៉ាវស្នេហារវាង ចន្ទមណី និង ទីឃាវុធ នៅតែទាក់ទាញឲ្យខ្ញុំចង់អានរឿង «មាលាដួងចិត្ត» ម្តងហើយម្តងទៀត។ ធ្លាប់អានយូរហើយទាំង ភាសាខ្មែរ និងការបកប្រែជាភាសាបារាំង ប៉ុន្តែស្ទើរតែភ្លេចសាច់រឿងទៅហើយ។ នេះជារឿងដែលអ្នកនិពន្ធ នូ ហាច តែងឲ្យតួជួបគ្នា ដែលខុសពីស្នេហាមិនសមបំណងរវាង ប៊ុនធឿន និងវិធាវី ក្នុងរឿង «ផ្កាស្រពោន»។

អ្វីដែលខ្ញុំចូលចិត្តរឿងនេះបំផុតនោះ គឺមានការលើក​និយាយពីស្រុកកំណើតរបស់ខ្ញុំ នៅក្រឡាញ់ ខេត្តសៀមរាប ដែលធ្លាប់ត្រូវបានប្តូរឈ្មោះទៅជា ភិប៊ុនសុងក្រាម ( ពិបុលសង្គ្រាម )….

#ReadingBook #KhmerLitterature

ពេញមួយឆ្នាំ២០១៧កន្លងមកនេះ ទោះបីជាខ្ញុំមិនបាន​សម្រេចអ្វីដែលមើលទៅអស្ចារ្យក៏ដោយ ប៉ុន្តែវាជាមោទកភាពមួយ​ក្នុងជីវិត​របស់ខ្ញុំ។

ក្នុងតួនាទី ជានិពន្ធនាយកនៃសារព័ត៌មានថ្មីៗ (www.thmeythmey.com) ខ្ញុំបាន​ក្លាយ​ជាចំណែកមួយដែលនាំឲ្យសារព័ត៌មាន​អនឡាញមួយនេះ មានភាពស្មើមុខស្មើមាត់ក្នុងបណ្តា​សារព័ត៌មាន​ឯករាជ្យនៅ​ក្នុង​ប្រទេសកម្ពុជា។ អូខេ! ពាក្យឯករាជ្យ ឬអាជីព អាចធ្វើឲ្យគេជ្រេញចិត្ត​ ប៉ុន្តែខ្ញុំ និងសហការី ពិត​ជាបាន​ខំប្រឹងប្រែងយ៉ាងខ្លាំង ដើម្បីធ្វើឲ្យបាន​ដូចសំដីរបស់ខ្លួន។

នៅក្នុងគ្រួសារ កូនស្រី ធីតា ឈានចូលដល់អាយុ៤ឆ្នាំកន្លះ រីឯកូនប្រុស បញ្ញា ចម្រើនវ័យដល់ជាង១ឆ្នាំហើយ។ ពិត​ណាស់ វាកូនៗរបស់ខ្ញុំ មិន​ត្រូវបាន​លំអ​ដោយសម្ភារ ឬយានជំនិះទំនើបៗក៏ដោយ ប៉ុន្តែ​ខ្ញុំ និងភរិយា តែងតែធ្វើឲ្យពួក​គេសប្បាយចិត្ត និងឆ្លើយតបទៅនឹងតម្រូវការ​របស់ពួក​គេ​ទៅ​តាមលទ្ធភាពដែលអាចធ្វើទៅបាន។

ទោះស្រកសាច់ ស្គម ញ៉ាំ និងគេងមិន​សូវគ្រប់គ្រាន់ [មើលតាមរូបភាពដែលថតដោយសហការី] ប៉ុន្តែខ្ញុំ​នៅតែសំឡឹងឆ្ពោះទៅមុខ​ជានិច្ច!

រំពឹង​ផល​វិជ្ជមាន​បន្ថែមទៀតនៅឆ្នាំ​២០១៨!