மனைவியின் சகோதரரின் நண்பரின் அக்காவின் மகனது திருமணம் ஆலப்புழாவில்; அவ்விழாவைச் சிறப்பிக்க பெங்களூருவிலிருந்து கொச்சுவேலி விரைவு வண்டியில் ஆலப்புழாவிற்கு கடந்த திங்கள் மாலை பயணம். ரயில் நிலையத்திலிருந்து எங்களை அழைத்துச் செல்ல அதிகாலையிலேயே ஆட்டோ அனுப்பியதில் ஆரம்பித்த அவர்களது அன்பான உபசரிப்பு ஆலப்புழாவிலிருந்து நகரும் வரை குறையவில்லை. பொங்கலன்று காலை சிற்றுண்டி குழாப்புட்டும் கடலைக் கறியும்; குடும்பத்தினருக்கு அவை உணவுக்குழலுக்குள் இறங்க மறுத்தது. பின்னே ஷிக்காரா படகில் குடும்பத்துடன் உப்பங்கழியில் ஓர் உலா. வழங்கப்பட்ட அறிவுரை ஆலப்புழாவிலிருந்து நெடுமுடிக்கு அரசு படகில் நீர்வழி பயணம், பின்னர் நெடுமுடியிலிருந்து ஆலப்புழாவிற்கு சாலை வழி பயணம்; நமக்கு தான் அறிவுரைகள் உரைப்பதில்லையே. மதியம் ஏரிக்கரையோர உணவகத்தில் மீன் சாப்பாடு, நண்டு வறுவல், ஒரு முழு விரால் மீன் வறுவல்; கேரள அரிசி யாருக்கும் ஒப்பவில்லை; உப்பும் காரமும் வேறு காணோம். திருமணம் நிகழும் இடத்துக்கு அருகில் தங்கிய விடுதி சரி வராததால், இணையத்தில் தேடி ஓமணப்புழாவில் ஒரு கடற்கரையோர தங்கும் விடுதியைப் பிடித்தோம். மாலையில் சிறு திருமணத்திற்கு முன்தின நிகழ்வு மற்றும் நண்பரின் குழந்தையின் பிறந்தநாள் விழா. மாட்டுப் பொங்கல் காலை ஓமணப்புழா கடற்கரையில் விடிந்தது; பேரலைகள். குழந்தைகளைக் கட்டுப்படுத்த முடியவில்லை. தேவாலயத்தில் எளிமையாக திருமணம் நடந்தேறியது; பின்னே வீட்டில் வரவேற்பும் மதிய உணவும். கேரள நாட்டின் கல்யாண சாப்பாடு. மாலை ஆலப்புழா கலங்கரை விளக்கத்தில் ஏறி ஊரின் அழகை ரசித்தோம். பின்னே கடற்கரையில் இருந்த மீன்கள் காட்சியகத்துக்குள் நுழைந்தோம்; உள்ளே கடற்கன்னியும் பல்வேறு மீன்களும். வெளியே ஊட்டி மிளகாய் பஜ்ஜி மற்றும் கோபி 65. காணும் பொங்கலன்று ஊரை சுற்றி பார்க்க ஒரு ஆட்டோவை அமர்த்தினோம். முதலில் குழந்தைகளுக்காக ஆனை சவாரி; களிறுக்கு அடுத்ததாக கயிறு அருங்காட்சியகம்(உள்ளே அனைத்தும் கயிற்றால் உருவாக்கப்பட்டவை); மதிய உணவுக்கு பின் பதிராமணல் தீவைப் பார்வையிட்டோம்(குறுக்கும் மறுக்கும் ஓடிய உடும்புகள் எங்களை வரவேற்றன; மர வீடும் அருமை; பூங்காவில் ஆடும் போது இளையவள் விழுந்ததால் அங்கிருந்து விரைவிலேயே நகர்ந்து விட்டோம்); மராரிகுளம் கடற்கரையில் கொஞ்சம் காற்று வாங்கி விட்டு நண்பர் வீட்டுக்கு செல்ல நேரம் இல்லாததால் நேராக பேருந்து நிறுத்தத்திற்கு விரைந்தோம். இவ்வாறாக இவ்வருட முதல் வெளியூர் பயணமும், பொங்கலும் ஆலப்புழாவில் கழிந்தது. அடிபொலி!