ដោយ៖ប៉ា ជេដ្ឋា
ភ្នំពេញៈ ធនាគារអេស៊ីលីដា និងអេស៊ីលីដា ស៊ីឃ្យួរឹធី បានចុះអនុស្សរណៈយោគយល់គ្នា ជាមួយ ក្រុមហ៊ុនតុងយ៉ាង ស៊ីឃ្យួរឹធី ដើម្បីរៀបចំខ្លួនសម្រាប់ការបោះផ្សាយលក់ និងការ ចុះបញ្ជីលក់មូលបត្រជាសាធារណៈ។
ប្រធាននាយកប្រតិបត្តិ ធនាគារអេស៊ីលីដា លោក អ៊ិន ចាន់នី បានមានប្រសាសន៍ក្នុងពីធីចុះ អនុស្ស រណៈយោគយល់គ្នា នៅថ្ងៃទី២៦ ខែតុលា នៅការិយាល័យកណ្តាលនៃធនាគារអេស៊ីលីដាថា ក្រុមហ៊ុនតុងយ៉ាង ស៊ីឃ្យួរឹធី ជាក្រុមហ៊ុនដែលឈានមុខគេមួយក្នុងទីផ្សារមូលបត្រប្រទេសកូរ៉េខាងត្បូង ដែលមានបទពិសោធន៍រយៈពេល ៤៩ឆ្នាំ ហើយធនាគារអេស៊ីលីដា មានបទពិសោធន៍១១ឆ្នាំ តាមរយៈការចុះ អនុស្ស រណៈយោគយល់គ្នានេះ ដើម្បីប្រើប្រាស់ជំនាញ និងបទពិសោធន៍ក្នុងការផ្តល់ជូនសេវាកម្ម ប្រឹក្សា និងហិរញ្ញវត្ថុ ព្រមទាំងរៀបចំការរៀបចំហិរញ្ញប្បទានសម្រាប់ការបោះផ្សាយលក់ និងការចុះបញ្ជីលក់មូលបត្រជាសាធារណៈ។
លោកបន្តថា”ការដែលយើងជ្រើសរើសយកក្រុមហ៊ុនតុងយ៉ាងស៊ីឃ្យួរឹធីនេះ ដោយសារតុងយ៉ាងជាក្រុមដ៏រឹងមាំ និងនាំមុខគេនៅកូរ៉េខាងត្បួង ហើយអេស៊ីលីដា ក៏ជាធនាគារពាណិជ្ជដែលនាំមុខគេនៅកម្ពុជាដែរ”។
ប្រធានក្រុមប្រឹក្សាភិបាល អេស៊ីលីដា ស៊ីឃ្យួរឹធី លោក ឆាយ សឿនដែលជាក្រុមហ៊ុនទទួលបានអាជ្ញាបណ្ណក្នុងការធ្វើអាជីវកម្មជើងសារមូលបត្រថ្លែងឲ្យដឹងថា “វាជាឱកាសថ្មីសម្រាប់វិនិយោគិន ជាពិសេសអ្នកវិនិយោគឯកត្តជន ធ្វើការវិនិយោគក្នុងទីផ្សារមូលបត្រកម្ពុជា ចាប់ពីការបោះផ្សាយលក់មូលបត្រលើកដំបូងជាសាធារណៈ”។
ប្រធាននាយកប្រតិបត្តិក្រុមហ៊ុនតុងយ៉ាង ស៊ីឃ្យួរឹធី លោក You Joon Ryeol បានមានប្រសាសន៍ផងដែរថា ការរួមគ្នានេះជាការធ្វើឲ្យកាន់តែងាយស្រួលក្នុងការទទួលបានការវិនិយោគដ៏ច្រើនទាំងក្នុងប្រទេស និងក្រៅប្រទេស សម្រាប់ការបោះផ្សាយលក់មូលបត្រលើកដំបូងជាសាធារណៈ។
លោកបន្តថា “យើងរីករាយនឹងជួយធនាគារអេស៊ីលីដា នៅក្នុងការរៀចំផែនការបោះផ្សាយលក់មូល បត្រលើកដំបូងជាសាធារណៈរបស់ធនាគារនាពេលអនាគត”។
ក្រុមហ៊ុនតុងយ៉ាងស៊ីឃ្យួរឹធីជាក្រុមហ៊ុនមួយក្នុងចំណោម៧ ដែលទទួលបានអាជ្ញាបណ្ណជាក្រុមហ៊ុនធានាទិញមូលបត្រ ទទួលបានកំពុងជួយរៀបចំក្រុមហ៊ុនរដ្ឋ២ ដើម្បីបោះផ្សាយលក់មូលបត្រលើក ដំបូង គឺរដ្ឋាករទឹកស្វយ័តរាជធានីភ្នំពេញ និងក្រុមហ៊ុនទូរគមនាគមន៍កម្ពុជា៕
pachetha 